Michael Flynn rrezikon të shkojë në burg. Ish-këshilltari i sigurisë së presidentit Donald Trump ka pranuar se ka gënjyer FBI për kontaktet me Rusinë dhe ka pranuar gjithashtu të dëshmojë kundër kolegëve të tij në Shtëpinë e Bardhë e ndoshta edhe kundër presidentit Trump.
Ish-gjenerali me 18 medalje ushtarake ka futur në hall të gjithë familjen Trump. Në fakt dëshmia e tij mund të godasë më së pari dhëndërrin e presidentit Jared Kushner, i cili mendohet të ketë qenë personi që e ka urdhëruar të nisë takimet me ambasadorin rus në Uashington, në kohën kur bëhej tranzicioni i ekipeve mes Obamës dhe trumpit, para hyrjes në Shtëpinë e Bardhë. Duket i parrezikuar ndërkaq zv.presidenti Mike Pence, ndërkohë që zyrtarët e tjerë të lartë amerikanë janë të gjithë të shenjuar “me vizë të kuqe”. Përfshirë Donaldin e Madh, shkruan La Repubblica.
Vetë Flynn rrezikon pesë vite burg. Kjo ka qenë oferta e FBI për të bashkëpunuar pa kushte dhe për të treguar gjithçka di. Dëshmia e tij, thonë mediat amerikane, mund të trondisë të gjithë ambjentin politik në Uashington. Përfshirë ministrin e drejtësisë Session, i cili e ka takuar edhe ai ambasadorin rus të paktën dy herë. Tashmë Shtëpia e Bardhë po shpejton të marrë distancë nga ish-gjenerali, por mbetet fakti që vetë Trump u përpoq me të gjitha mënyrat që ta pengonte në fillim, hetimin ndaj Flynn, duke ndërhyrë pranë ish-kreut të FBI James Comey. Të cilin më pas e pushoi nga detyra.
Michael Flynn ka lindur në vitin 1958 në Rhode Island, është i martuar dhe ka dy fëmijë. Ka kaluar 33 vjet në ushtrinë amerikane, i fokusuar në shërbimet inteligjente ushtarake. Filloi karrierën zyrtare me presidentin Obama, i cili e largoi në vitin 2014. Pas ikjes nga administrata Flynn hap një firmë konsulence, e cila citohet këto orë mjaft herë në raportet e hetimit të FBI. Vendos lidhje të forta me Rusinë dhe shfaqet disa herë në programet televizive ruse, deri tek fotoja e famshme me presidentin Putin, në një mbrëmje gala në Moskë. Ka pasur gjithashtu raporte të ngushta me afaristë turq dhe qeverinë e Erdogan. Në vitin 2016, duke lexuar me zgjuarsi humorin gri të amerikanëve ndaj muslimanëve, Flynn u hodh në sulm me teza të forta anti-islamike. Shkruan një libër me titull “Fusha e betejës”, i fikusuar në luftën ndaj radikalizmit islamik dhe fillon t’i bjerë kësisoj në sy Donald Trumpit. Ky i fundit e ftoi Flynn në Konventën Republikane, ku ish-gjenëerali elektrizoi sallën me thirrjet “Futeni në burg” (adresuar Hillari Klinton). Profil më të mirë për Donald Trumpin zor se gjeje./Javanews/
