Prokuroria e Krimeve të Rënda ka firmosur fletë arreste për disa zyrtarë të policisë, kryesisht në qarkun e Vlorës në kuadër të hetimeve që po kryhen në Shqipëri për trafikun e drogës, pas dosjes së antimafias italiane për Habilajt, për të cilin nën hetim është marrë edhe Sajmir Tahiri.
Fletë arrestet mësohet se janë lëshuar në orët e paradites dhe dyshimet e ngritura janë se prej disa orësh ato nuk janë ekzekutuar. Prokuroria kërkoi arrestimin e Jueld Çelës, Gjergji Kohila dhe Sokol Bode.
Shërbimi për Çështjet e Brendshme dhe Ankesat mësohet se ka kryer disa kontrolle në Vlorë në përpjekje për të arrestuar dy nga funksionarët e policisë, por sikundër raportohet ato nuk janë gjetur në banesat e kontrolluara. Burimet bëjnë të ditur se prej mesditës dy zyrtarët janë në kërkim, ndërkohë që ka dyshime se aksioni mund të jetë dekonspiruar.
Nëse kjo do të rezultojë e vërtetë, do të përbënte një tjetër skandal, atë të dekonspirimit të një operacioni të urdhëruar nga krimet e rënda.
Ndërkohë raportohet se asnjë prej fletë arresteve nuk është zbatuar, përfshi këtu edhe atë për ish-drejtorin e policisë së Vlorës, që është zyrtari më i lartë që pritet të arrestohet, që prej publikimit të dosjes Habilaj.
Krimet e Rënda kërkuan arrestimin e ish-ministrit të Brendshëm, Sajmir Tahiri, por kërkesa e tyre nuk u pranua nga Kuvendi. Socialistët miratuan vetëm kërkesën për kontroll banese ndaj Tahirit, ndërsa ai ndodhet zyrtarisht nën hetim dhe është marrë në pyetje nga Prokuroria e Krimeeve të Rënda.
