Ish-ambasadori i Shqipërisë në Greqi, Bashkim Zeneli, e cilëson të panevojshme dhe të turpshme praninë e ministrave Bushati dhe Kumbaro në pikën kufitare të Kakavijës, pas një problemi teknik në palën greke.
Në një intervistë për “Panoramën”, ish-ambasadori thekson se probleme të tilla janë të zakonshme në pikat kufitare ndaj edhe prezenca e ministrave është e tepërt dhe nuk ndihmon në zgjidhjen e çështjes.
“Unë e quaj jo vetëm një veprim të gabuar dhe aspak të justifikuar prezencën e dy ministrave të qeverisë sonë në pikën kufitare të Kakavijës, por e quaj edhe një shou populist, krejtësisht të panevojshëm dhe të turpshëm”- thote ai.
Për ish-ambasadorin e Shqipërisë në Greqi, bllokimi i pikës kufitare nuk ka prapavijë politike dhe nuk lidhet me ngjarjet e pak ditëve më parë në Himarë, por sipas tij edhe nëse ministrat kishin dyshime të tilla, duhet t’i zgjidhnin marrëveshjet përmes kanaleve diplomatike.
