Banka Botërore deklaroi se taksat e larta janë arsyeja kryesore që kanë përkeqësuar klimën e biznesit në Shqipëri. Sipas raportit Doing Business, në vetëm një vit renditja e Shqipërisë në treguesin “Paying Taxes” u përkeqësua me 28 pozicione.
Vitin e kaluar Shqipëria ishte vendi i 97-të në botë për sistemin më torturues të taksave, ndërkohë që këtë vit ajo renditet e 125-a në botë.
Sipas Bankës Botërore, bizneset në Shqipëri paguajnë taksa më të larta se sa ekonomitë e rajonit, përballen me kontrolle të shumta dhe përveç kësaj harxhojnë qindra orë në vit për të paguar taksat për shkak të procedurave të rënduara burokratike.
Renditja
Treguesi Paying Taxes mat analizon katër indikatorë. Ata janë përqindja e taksës që paguajnë bizneset mbi fitimin e tyre, orët që shpenzojnë për të paguar taksat, numri i pagesave si dhe rimbursimi.
Sipas Bankës Botërore, aktualisht një biznes në Shqipëri paguan 37.3 për qind të fitimit si taksë për qeverinë. Në Europë dhe Azi bizneset paguajnë mesatarisht 33.1 për qind të fitimit si taksë, ndërsa në ekonomitë e ngjashme të rajonit barra e taksave është shumë më e ulët.
Por taksat e larta nuk janë treguesi i vetëm ku Shqipëria renditet me keq. Paralelisht bizneseve shqiptare atyre u duhet të shpenzojnë 261 orë në vit për të paguar taksat, nga 218 orë që është mesatarja e Europës.
Por përveçse paguajnë taksat më të larta dhe kanë procedurat më torturuese, bizneset në Shqipëri e kanë të vështirë edhe të rimbursojnë tatimin mbi vlerën e shtuar.
