Më 31 gusht, Drejtori i Policisë së Shtetit, Haki Çako i ka nisur një letër ish-ministrit të Brendshëm teknik, Dritan Demiraj, ku e njofton se aksionet antidrogë të policisë në det kanë dështuar falë mosfunksionimit të radarëve të vëzhgimit.
Çako i sjell si shembull Demirajt dështimin e operacionit të mbrëmjes së 11 gushtit, ku policia nuk mundi të kapë një gomone që ishte nisur dy kilometra nga plazhi i Zvërnecit. Sipas Çakos, qendra kishte dhënë koordinata të pasakta të lëvizjes së gomones me drogë.
Sipas kreut të policisë, radarët janë aq problematikë, sa ka pasur raste kur gomonet e policisë viheshin në ndjekje të njëra tjetrës.
“Mosdhënia e informacionit krijoi konfuzion dhe pati raste kur mjetet që merrnin pjesë në operacion filluan të ndiqnin njëra-tjetrën në hapësirën detare.” – shkruhet në letrën që ka publikuar ‘News24.
Ai jep edhe një shembull tjetër. Kur është kërkuar rishikimi i të dhënave të marra nga radarët, në to nuk është mundur të gjehet asnjë gjurmë nga ngjarjet e regjistruara më parë.
“Në mjaft raste përfaqësuesit e policisë kanë kërkuar kthimin mbrapa të sistemit për ngjarje, me orare dhe data konktrete, të lëvizjes së mjeteve lundruese të konstatuara nga shërbimet e policisë, por në asnjë rast në sistem nuk ishin evidentuar dhe nuk u gjetën gjurmë të dhënat, megjithëse mjetet lundruese të kapura nga Guardia di Finanza në Itali kanë qenë me përmasa që duhet të ishin zbuluar, identifikuar nga ky system”, – shkruan drejtori i Përgjithshëm i Policisë së Shtetit.
Me këto argumenta të dyshimtë, Haki Çako i kërkon Dritan Demirajt të marrë masa për përmirësimin e kësaj situate, që lufta kundër drogës të jetë më efikase.
