Ditën e shtunë në qytetin e Durrësit, u zhvillua një protestë e cila nuk u transmetua nga mediat. Dhjetra banorë u mblodhën për të protestuar përpara projektit të quajtur “Veliera” e cila po ndërtohet mbi disa objekte arkeologjike, të rëndësishme për historinë e vendit tonë.
E gjithë zona është betonuar, ndërsa monstruoziteti i këtij projekti duket se ka gllabëruar çdo trashëgimi kulturore. Protesta u organizua nga të rinj dhe qytetarë të ndryshëm, të cilëve ju bashkuan edhe turistë të huaj, të cilët në fjalët e tyre shprehën habinë se si ky projekt po zbatohej pranë torrës Veneciane, duke dëmtuar arkeologjinë dhe duke mos ofruar asgjë për turistët.
Kërkesa e protestuesve ishte që objektet arkeologjike të zbuluara të shpallen monument kulture dhe të merren në mbrojtje nga shteti. Kjo protestë erdhi pas mbulimit me beton përpara një jave të murit rrethues të qytetit, që i përkiste periudhës romake. Protesta u organizua nga grupimi qytetar-rinor “Aktiv për Durrësin”, të cilët kanë çelur edhe një peticion në internet, i cili numëron mbi 500 firma, me subjekt: “Shpalljen monument kulture të zbulimeve arkeologjike”.
Protestuesit kërkuan edhe ndalimin e projektit tek Mazuoleumi i Dëshmorëve, pasi sipas tyre një muaj më parë përfundoi një gërmim arkeologjik me qëllim shkencor, i cili nxorri në dritë terma (banjo) romake. Por në këtë zonë, si edhe në projektin e ndërtimit të shkollës “Marie Kaçulini”, ndërtimin e pallatit tek parku sportiv, ka prani mozaiqesh dhe strukturash arkeologjike me shumë vlerë. Në shenjë simbolike, përgjatë këtij marshimi-protestë tërësisht paqësor, u derdh bojë e kuqe mbi perimetrin ku u mbulua me beton muri rrethues i qytetit.
