Sheshi Adem Jashari, në hyrjen e bllokut të ambasadave nga ana e rrugës së Durrësit, do të jetë vetëm me një rrugë për makinat. Deri para disa javësh makinat rrotulloheshin rreth tij. Tani kjo hapësirë publike është rikonstruktuar, si pjesë e hyrjes së një hoteli që është në pronësi të ish -deputetit Mark Frroku që gjendet në burg dhe vëllait të tij të dënuar për vrasjen e kryekomisar Dritan Lamajt. Asaj i është hequr një degëzim rruge që kalonte para hotelit, që dikur ishte mollë sherri mes Mark Frrokut dhe deputetit Tom Doshi. Kryetari i Bashkisë Erion Veliaj ka postuar disa foto të sheshit të ri, që i shoqëron me një falenderim për “kolegët”. Veliaj nuk thotë se kush i dha fondet për këtë ndërtim dhe kush ishin “kolegët” që e ndërtuan këtë shesh, që më shumë se për qytetarët, duket se është ndërtuar për të qenë në funksion të hotelit.
