Shëndetësia në Shqipëri dihet që është në nivelin më të keq të mundshëm, lë shumë për të dëshiruar dhe mund të renditet pa frikë tek anët e errëta e punët më negative të bëra në vendin tonë. Kjo dëshmohet herë pas here nga qytetarët në të gjithë territorin e Republikës së Shqipërisë, si për pjesën e infrastrukturës, e cila është tërësisht në dorë të shtetit, si për punën e mjekëve që në pjesën më të madhe është për të vënë duart në kokë.
Normalisht, nuk mund të mohojmë faktin që ka edhe mjekë të aftë, profesionistë e humanë në punën e tyre, por problemi qëndron tek ata mjekë që i hedhin pacientët e tyre në rrugë, apo i lënë në duart e studenteve të reja (pa dashur të ofendojmë studenten shembullore për të cilën do t’ju tregojmë).
Kështu, mjeku kirurg në pediatrinë e Qendrës Spitalore Universitare “Nënë Tereza”, Dritan Alushani, i cili duhet të rrijë herë pas here edhe si mjek roje, duket se ka hequr dorë nga profesioni, por i pëlqen vetëm rroga që merr. Ai i ka lënë vendin e tij një vajze të re, ndoshta studente, e cila kontrollon pacientët e vegjël, kujdeset për ta, u jep receta dhe në fund firmos e vulos në emër të mjekut.
Doktor Dritani, siç thotë mesazhdërguesi, nuk është parë prej kohësh në pediatri dhe zakonisht gjendet në një nga hotelet luksoze të Tiranës duke luajtur tenis. Në video duket qartësisht që vajza e re kujdeset deri në detaje për fëmijët e vegjël dhe bravo i qoftë. Ndoshta nesër do të bëhet një mjeke shumë e zonja, por a është ajo tërësisht e aftë t’ju vijë në ndihmë të gjithë pacientëve të vegjël?
