Prodhimi vendas i energjisë po rritet me ritme të shpejta nga viti në vit falë ndërtimit të hidrocentraleve të reja, të cilat janë dhënë me konccesion nga qeveria e kaluar. Enti Rregullator i Energjisë deklaroi se vitin e kaluar përfundoi ndërtimi edhe për 16 hidrocentrale të tjera private, të cilat e kanë rritur me gati 10 për qind fuqinë energjetike të vendit.
“Gjatë vitit 2016 kanë hyrë në operim gjithsej 16 centrale me fuqi totale të impianteve gjeneruese prej 123.4 MW,”-shkruhet në raportin vjetor të 2016-ës, që ERE ka dorëzuar në Kuvend.
Në total Shqipëria ka një fuqi të instaluar energjetike prej rreth 1440 megavat, dhe falë HEC-eve që hynë në punë vitin e kaluar kapaciteti prodhues i vendit u rrit edhe me gati 10 për qind.
Prodhimi
Vitin e kaluar prodhimi vendas i energjisë arriti në 7.1 miliardë kilovat orë. Sipas Entit Rregullator, HEC-et private prodhuan rreth 2 miliardë kilovat orë energji elektrike duke dhënë kështu mbi 28.5 për qind të prodhimit total vendas.
Zhvillimi i shpejtë e sektorit vendas të energjisë nuk është i rastësishëm, por rezultat i një politike agresive për mbështetjen e këtij sektori nga qeveria e kaluar.
Shqipëria nisi ndërtimin e hidrocentraleve private në vitin 2006, kur qeveria e Partisë Demokratike e shndërroi këtë fushë në prioritet për zhvillimin e vendit. Përgjatë periudhës 2006-2010 ajo firmosi me sektorin privat ndërtimin e mbi 440 hidrocentrale të reja me konçesion. Shumë prej këtyre hidrocentraleve tashmë kanë hyrë në prodhim duke fuqizuar sektorin energjetik dhe ekonominë.
Vitin e kaluar Shqipëria rezultoi një vend eksportues neto i energjisë, që do të thotë se vendi prodhoi më shumë energji nga nevojat e veta për konsum dhe këtë pjesë e shiti në tregjet e huaja.
