Gjykata Ndërkombëtare Penale (ICC) ka hedhur poshtë të premten, 17 tetor, kërkesën e Izraelit për të apeluar urdhër-arrestinndaj kryeministrit Benjamin Netanyahu dhe ish-ministrit të Mbrojtjes, Yoav Gallant, lidhur me luftën në Rripin e Gazës.
Në një vendim që bëri jehonë në mbarë botën, GJNP kishte gjetur në nëntor arsye për të besuar se Netanyahu dhe Gallant mbanin “përgjegjësi penale” për krime lufte dhe krime kundër njerëzimit të kryera në Gaza.
Gjykata kishte lëshuar gjithashtu urdhër-arrest për tre drejtues të lartë të Hamas, të akuzuar për organizimin e sulmit të 7 tetorit 2023, që shkaktoi shpërthimin e luftës në Gaza, por këto urdhra u hoqën më pas pasi të tre u vranë nga Izraeli.
Urdhër-arresti ndaj Netanyahu-t dhe Gallant shkaktoi indinjatë në Izrael dhe në Shtetet e Bashkuara, të cilat më pas vendosën sanksione ndaj zyrtarëve të lartë të kësaj gjykate
Netanyahu e quajti vendimin antisemit (armiqësor ndaj hebrenjve), ndërsa presidenti i atëhershëm amerikan, Joe Biden, e cilësoi të tmerrshëm.
Izraeli kishte kërkuar në maj që gjykata të rrëzonte urdhrat e arrestit, ndërsa priste një vendim tjetër mbi kompetencën juridiksionale të Gjykatës për këtë çështje.
Por më 16 korrik, gjykata e refuzoi këtë kërkesë, duke theksuar se “nuk kishte bazë ligjore” për të pezulluar urdhrat ndërkohë që shqyrtohej sfida mbi juridiksionin. Një javë më vonë, Izraeli kërkoi leje për të apeluar këtë vendim, por trupit gjykues i mjaftuan 13 faqe për të arritur në përfundimin se “çështja, ashtu siç është formuluar nga Izraeli, nuk përbën objekt apelimi”.
“Dhoma, për rrjedhojë, e refuzon kërkesën“, thuhet në vendimin e plotë të GJNP-së.
Gjykatësit janë ende duke shqyrtuar një ankim të Izraelit mbi kompetencën e gjykatës për të trajtuar rastin ose jo.
Nuk dihet ende se kur gjykata do të japë vendimin përfundimtar mbi këtë çështje.
