Nga Boldnews.al
Mbrëmjen e së premtes, Avokati i Popullit ka zbardhur listën e kandidatëve të cilët plotësojnë kriteret për të garuar në formimin e organeve të reja të Vettingut. Sipas një njoftimi për media, në këtë proces që u monitorua edhe nga ekspertët e Operacionit Ndërkombëtar të Monitorimit, nxorri 29 kandidat fitues nga 192 në total.
Në listën e të pranuarve bien në sy edhe emrat e Albana Shtyllës – Sekretare e Përgjithshme e Kuvendit, ish-kryeprokurorja Ina Rama, Shpresa Beçaj – Ish-kryetare e Gjykatës së Lartë, dhe ish-anëtari i KLD-së, gjykatësi Sokol Çomo.
Fituesit do të kenë të drejtën për të vijuar më tej garën për anëtarë të institucioneve të rivlerësimit kalimtar të gjyqtarëve dhe prokurorëve në Republikën e Shqipërisë, i njohur ndryshe si Vetting.
Por ky numër i vogël kandidatësh ka vënë në pikëpyetje procesin e Vetting-ut, pasi 163 aplikime të tjera janë skualifikuar sepse nuk plotësonin kriteret. Në fakt një jurist i cili garon për pozicionet e Vetting-ut është fare i qartë për procesin e përzgjedhjes dhe kriteret që duhet të plotësohen. Në lista madje u panë edhe të rinjë që nuk i kalonin 30 vjeç, pavarësisht se një nga kriteret ishte 15 vite eksperiencë si jurist apo nënpunës civil.
Dyshimet ngrihen mbi “flamurtarët” e reformës të cilët deri në ditët e fundit të afatit ka patur shumë pak kandidatë të cilët garonin për organet e Vetting-ut. Por ky numër i madh kandidatësh të skualifikuar të bëjnë të mendosh se një pjesë e mirë e tyre mund të jenë “urdhëruar” në orët e fundit nga partia për të kandiduar.
Kjo fryrje artificiale e kandidatëve duket se ka ndodhur për shuar zërat se procesi po shkonte drejt dështimit për shkak se nuk kishte persona që kishin interes për të konkurruar. Në krah të “flamurtarëve” të reformës së drejtësisë u gjenden edhe BE e SHBA të cilët bënë disa herë thirrje për më shumë pjesëmarrje për organet e Vetting-ut.
Apeli ju drejtua edhe shqiptarëve patriotë, të cilët në fakt më shumë se patriotë rezultuan militantë të bindur. Kjo e tregoi qartë lista me 163 kandidatë të skualifikuar që nuk plotësonin kriteret.
E sikur mos të mjaftonin këto dyshime ndaj procesit, Avokati i Popullit bëri publik edhe emrat e organizatave që përmbushin kriteret, të cilat do të kryejë verifikimin paraprak të kandidaturës për anëtarin që përfaqëson shoqërinë civile, si në Këshillin e Lartë Gjyqësor edhe në Këshillin e Lartë të Prokurorisë. Mes organizatave kualifikuese është edhe Fondacioni Shoqëria e Hapur e filantropit George Soros. Kjo shton akoma edhe më tej zërat se e gjithë reforma në drejtësi jo vetëm që është e financuar nga Soros por edhe e kontrolluar prej tij,
Në përfundim të këtij procesi, Avokati i Popullit i ka dorëzuar Operacionit Ndërkombëtar të Monitorimit listat e kandidatëve, si dhe të gjitha dosjet individuale fizike të aplikimeve të shqyrtuara për këta kandidatë.
Vlerësimi dhe rekomandimet për kandidatët nga Operacioni Ndërkombëtar i Monitorimit, do t’i përcillen Avokatit të Popullit, që së bashku me dy listat e sipërcituara do t’ia dorëzojë më pas Kuvendit të Shqipërisë.
