Ngjarjet e rënda të kohëve të fundit e kanë bërë Sajmir Tahirin ta humbasë qetësinë. Ai nuk i ka mbajtur dot nervat kur është shfaqur përpara kamerave për përurimin e komisariatit të kombinatit dhe është pyetur për dështimin e policisë në kapjen e autorëve që vodhën furgonët e bankës në Rinas. Tahiri ka folur me ton reporterëve dhe u ka “tërhequr vërejtjen” se ata nuk thonë ndonjë fjalë të mirë kur policia kryen detyrën, por vetëm kritikojnë atëherë kur ngodhin ngjarje. “Për ju nuk janë ditë të gëzuar atëhere kur ndodhin ngjarjet” ka thënë ai.
Dhe në stlin e zakonshëm që po shndërrohet në markë të kësaj qeverie, (pra duke mos iu përgjigjur pyetjes por duke e sulmuar atë që e ngre) Tahiri nuk ka shigjetuar vetëm gazetarët, por edhe opozitën. “Policia deri dje ishte e braktisur. Sot është në qendër të vëmendjes tonë me më shumë infrastrukturë me më shumë kapacitet për t’i shërbyer qytetarëve. Kjo është përplasja e të djeshmes me sot, por kjo është edhe përplasja mes Shqipërisë së llafeve dhe asaj të punës’’, tha ministri Tahiri duke kopjuar me përmendjen e punës, rivalin e tij llërëpërveshur.
Por situata është bërë më e rëndë pasi janë fikur kamerat. Ministri i Brendshëm ka vazhduar komunikimin e reporterët dhe ai ka vazhduar me të njëjtin ton t’u kërkojë llogari për pyetjet që bëjnë. Ai ka arritur kulmin kur u ka thënë: “Nuk keni bythë të godisni ndonjë ministri tjetër, si p.sh ministria e Transporteve, por sulmoni vetëm ministrinë e Rendit. Gazetarët që ndodheshin pranë ministrit kanë rrëfyer një Sajmir të dalë nga vetja dhe të eksituar nga zemërimi.
(Lapsi.al)
