Dy vlonjatë, që po tentonin të trafikonin lëndë narkotike, kanë rrezikuar të mbyten në det, nëse në ndihmë të tyre nuk do të shkonin forcat e rojes bregdetare italiane.
Sipas raporteve të medias italiane skafi me të cilin udhëtonin dy shqiptarët ishte gjysëm i fundosur dhe për këtë arsye, në ndihmë u ka shkuar anija me flamur të Maltës, që e ndihmuar edhe nga rojet bregdetare italiane, ka mundur t’i shpëtojë.
Operacioni për shpëtimin e tyre nuk ka qenë i lehtë dhe ka zgjatur disa orë në det.
Pas kontrollit të skafit, policia italiane ka zbuluar se mjeti lundrues ishte i mbushur plot me drogë. Dyshimet janë për 1.5 ton kanabis. Ka qenë pikërisht mbingarkesa që ka sjellë mbytjen e skafit.
Dy vlonjatët janë vënë në pranga.
Ende nuk janë dhënë detaje mbi identitetin e dy të arrestuarve.
