Analisti Ilir Kulla ka zbuluar për herë të parë se nga ambasada e SHBA në Tiranë kishte shkuar një kabllogram në SHBA, ku çështja “Balili” i faturohej kryeparlamentarit Ilir Meta.
Duke folur si i ftuar në emisionin Arena në Rtv Ora News, Kulla tha se Meta e mësoi këtë pas vizitës në Amerikë.
“Kur Meta u kthye nga Amerika, ai kërkoi mbledhjen e Këshillit të Sigurisë Kombëtare pasi u gjet përpara faktit që nga ambasada e Tiranës kishte shkuar një kabllogram që i faturohej çështja Balili. Ai tha hajt ta mbledhim dhe ta gjejmë i kujt është Balili”, tha ai.
Sipas Kullës ishte pikërisht intervista e Ylli Manjanit ku deklaroi se Sorosi kishte financuar reformën në drejtësi dhe për t’ia dhënë kontrollin e saj Partisë Socialiste, ajo që solli shkarkimin e Manjanit nga posti i ministrit të Drejtësisë.
“Arsyeja e shkarkimit është një intervistë tek Sokol Balla, e cila çoi në panik ambasadorin amerikan, ku Manjani tha se reforma u bë me sponsorizimin e Sorosit dhe me pagesën e Sorosit, me qëllim që t’i jepet pushteti i drejtësisë një sistemi të vetëm, pra Partisë Socialiste. Dhe këtë e ka thënë edhe në publik. Kjo gjë e nxori nga sistemi. Gjatë gjithë periudhës që ka qenë ministër, ka qenë në konflikt por kjo ishte pika që e nxori situatën jashtë kontrollit”, tha Kulla.
Analisti Kulla është bashkëpunëtor i afërt i kreut të Kuvendit Ilir Meta.
