“Politika nuk është as aritmetikë e as matematikë”. Kështu ka deklaruar në një postim në rrjetin social Facebook, këshilltari dhe zëdhënësi për mediat i kryeparlamentarit dhe kreut të LSI, Ilir Metës, Emiljano Aleksi, i cili ironizon një lajm të Top Channel që pretendon se sikur LSI të dilte vetëm, PS me Idrizin dhe Topin do të kishin 72 mandate në parlament.
“Gjithmonë ekzistonte legjenda që zgjedhjet do të dalin aty-aty. Do të dalë e majta (+ FRD) dy mandate para, 72 me 68 apo 71 me 69, sepse bëhen kalkulime aritmetike. Pra, sa ka marrë LSI-ja para zgjedhjeve, sa ka marrë PD-ja, sa ka marrë PS-ja e kështu me radhë, ndërkohë që politika nuk është as aritmetikë e as matematikë, është më shumë #KIMI. Dhe natyrisht që ka proceset e saj, ka reaksionet e saj dhe absolutisht garës asnjëherë nuk i dihet deri në fund”, shkruan Aleksi.
Top Channel raportoi se ka analizuar me ekspertë elektoralë ndarjen e mandateve sipas votave të vitit 2013, nëse LSI-ja kandidon më vete dhe PDIU dhe FRD i bashkohen Partisë Socialiste. Koalicioni i ri do kishte 72 mandate dhe LSI e vetme 11. Por mazhoranca do ishte më e dobët se ajo e Berishës në 2009-n.
