Kryeministri Edi Rama shkarkon Ylli Manjanin nga posti i ministrit të Drejtësisë.
Në vend të Manjanit propozohet kreu i grupit parlamentar të LSI, Petrit Vasili, bën me dije Kryeministria. Në njoftimin për shtyp të Kryeministrisë, e cila ka publikuar letrën e shkarkimit, drejtuar presidentit Bujar Nishani, nuk jepet motivacioni për shkarkimin e Manjanit.
Lëvizja Socialiste për Integrim zbardhi arsyet pse ka vendosur të zëvendësoje ministrin e Drejtësisë, Ylli Manjanin, me një drejtues tjetër të saj: Petrit Vasilin, për atë që e konsideroi si ‘iniciativë e Kryeministrit Edi Rama”.
Sekretarja për Marrëdhënien me Publikun në LSI, Erisa Xhixho tha: “U konkludua që LSI të propozojë z. Petrit Vasili, nisur nga fakti se ai ka drejtuar grupin e Reformës në Drejtësi”.
Më herët gjatë ditës kryeministri Rama takoi për 45 minuta në Kryesinë e Kuvendit, kreun e LSI, Ilir Metën. Pas këtij takimi, Meta priti në zyrë Manjanin, ku mesa duket i ka komunikuar edhe vendimin e shkarkimit nga Rama.
Mesa duket shkarkimi i Manjanit është një vendim i minutave të fundit, pasi mesnatën e djeshme vetë Manjani përmes një statusi në Facebook mohoi lajmet për shkarkimin e tij. Po sot numri dy i qeverisë Niko Peleshi mohoi zërat për shkarkim të mundshëm të Manjanit.
