Gjykatës Kushtetuese tanimë i duhet të vendosë për ligjin e dekriminalizimit që prek politikanët dhe zyrtarët me rekorde kriminale.
Ish-kreu i Bashkisë së Kavajës, Elvis Roshi, i shkarkuar nga detyra për shkak të “Dekriminalizimit” mësohet se i ka kërkuar gjykatës të shpallë antikushtetutes nenet kryesore të këtij ligji.
Arsyet u shpjeguan nga avokati i Roshit, Theodhori Sollaku:
“Kufizimi i së drejtës lejohet sipas nenit 17 të Kushtetutës, mohimi për jetë i së drejtës për t’u zgjedhur është një shkatërrim i kësaj të drejte. Është një mohim total dhe ne mendojmë se në këtë rast jemi në kushtet e antikushtetueshmërisë së ligjit”, tha avokati Sollaku.
Ka edhe një kërkesë të katërt lidhur me shqyrtimin tërësor të ligjit të dekriminalizimit.
“Ne nuk paragjykojmë se ç’do të ndodhë, do ketë presione apo kërcënime, por shpresojmë që Gjykata Kushtetuese të ketë profesionalitetin që të japë një vendim sipas Kushtetutës dhe së drejtës europiane të njeriut”, tha Sollaku.
Ligji i dekriminalizimit u miratua 2 vite më parë pas një marrëveshjeje të vështirë mes qeverisë dhe opozitës, me ndërmejtësim ndërkombëtar.
Ky ligj është komentuar shpesh si një ligj në kufijtë e kushtetueshmërisë.
