Kryeparlamentari Ilir Meta gjatë vizitës së tij në Kosovë ka shprehur bindjen se kreu i AAK-së, Ramush Haradinaj së shpejti do të kthehet në Kosovë.
Zoti Meta në një konferencë për media ka thënë se kjo çështje do të marrë fund shumë shpejt, pasi Ramush Haradinaj nuk është qytetar i Serbisë, por i Kosovës dhe si i tillë është simbol i qytetarëve shqiptarë në të gjithë botën, raporton “Zëri”.
“Kjo çështje do të marrë fund shumë shpejtë pasi Ramush Haradinaj nuk është qytetar i Serbisë, por është qytetarë i Kosovës dhe si i tillë është simbol i qytetarëve shqiptarë në të gjithë botën. Haradinaj është një krenari për të gjithë Shqiptarët dhe për faktin se ai është përballur me kurajo dhe dinjitet edhe përballë drejtësisë ndërkombëtare”, ka thënë Meta.
Meta ka thënë se do t’i dërgojë homologes së tij serbe një shkresë në lidhje me këtë rast, ndërsa ka shtuar se ka kontaktuar me homologun e tij francez menjëherë pas marrjes së lajmit për arrestim pasi që, siç tha ai, “duam që këtij rasti t’i jepet fund pasi kemi të bëjmë me një simbol të sakrificës shqiptare”.
