Kryetari i Prezencës së OSBE-së në Shqipëri, Bernd Borchardt, në hapje të Forumit për Zhvillimin e Medias, tha se profesionalizmi i medias, balanca dhe pavarësia në mbulimin e zgjedhjeve, janë parakusht për zgjedhje demokratike.
:Ne, tha ambasadori, jemi të shqetësuar për praktikën e përhapur gjerësisht ne Shqipëri të transmetimit të produkteve të njësive të Marrëdhënieve me Publikun të partive politike, në vend të raportimit të paanshëm mbi fushatat politike.
Të ashtuquajturat “kasetat e partive” duhet të transmetohen vetëm si pjesë e programeve që etiketohen qartë si marketing politik. Asgjë nuk mund të zëvendësojë një mbulim mediatik të prodhuar në mënyrë autentike dhe të pavarur, nënvizoi Borchardt.
Duke ripërsëritur angazhimin e OSBE-së në mbështetje të reformës zgjedhore, ambasadori solli në vëmendje një nga rekomandimet e kësaj organizate në vitin 2015 për “shfuqizimin e dispozitave të nenit 84 të Kodit Zgjedhor që lejon filmimet e prodhuara nga partitë politike të transmetohen në lajme.”
Gjithashtu, Borchardt siguroi mbështetjen e OSBE-së për gazetarët, duke nënvizuar se ata meritojnë pozicion shoqëror më të mirë dhe siguri në punë. Ai bëri thirrje për zbatimin e kodit të punës në të gjitha kompanitë mediatike. Punësimi informal në media mbetet një praktikë e përhapur gjerësisht, nenvizoi ambasadori, dhe kjo sjell mungesën e pavarësisë editoriale duke i hapur derën presioneve të ndryshme.
