Gjykata Kushtetuese la të martën në fuqi pezullimin e ligjit të Vettingut, duke rrëzuar kërkesën e Kuvendit për heqjen e tij. Seanca e sotme gjyqësore, në prani dhe të ambasadorëve Romana Vlahutin e BE-së dhe Donald Lu i SHBA-ve, mori në shqyrtim kërkesën e Partisë Demokratike dhe të Unionit të Gjyqtarëve, që kërkojnë shpalljen antikushtetues dhe ruajtjen e masës së pezullimit për ligjin e Vettingut, i miratuar më 30 gusht në parlament, vetëm me votat e maxhorancës.
Trupa gjyqësore dëgjoi argumentet “pro” dhe “kundër” të paraqitura nga palët e interesuara, Kuvendi i Shqipërisë, Partia Demokratike dhe Unioni i Gjyqtarëve. Në emër të Kuvendit, deputeti i maxhorancës Pandeli Majko tha se ende nuk është mësuar arsyeja se përse ligji i Vettingut është pezulluar, duke kërkuar heqjen e kësaj mase.
Ndërsa Partia Demokratike dhe Unioni i Gjyqtarëve mbështetën lënien në fuqi të pezullimit, pasi ligji sipas tyre shkel Kushtetutën. Përfaqësuesi i Unionit, Gerd Hoxha tha se heqja e pezullimit rrezikon vendin e punës për shumë gjyqtarë e prokurorë. Në mbështetje të këtij qëndrimi ishte dhe përfaqësuesi i PD, Gazmend Bardhi, që këmbënguli në ruajtjen e masës së pezullimit.
Megjithate, seanca e sotme nuk është vendimarrëse, para ardhjes se Opinionit të Komisionit të Venecias, të cilit i është drejtuar per marrje mendimi Gjykata Kushtetuese. Kjo e fundit, më 25 tetor vendosi të pezullojë zbatimin e ligjit të Vettingut, duke çuar praktikisht në bllokimin e reformës në drejtësi.
Kjo Gjykatë, iu drejtua me pas Komisionit të Venecias për t’i dhëne një opinion nëse ligji është ose jo në përputhje me Konventën Europiane për të Drejtat e Njeriut dhe Kushtetutën e Republikës së Shqipërisë.
Ligji i Vettingut, i asistuar gjerësisht nga misionet ndërkombëtare të drejtësisë, OPDAT dhe EURALIU-s, konsiderohet si thelbi i gjithë procesit të reformës në drejtësi, pasi synon rivlerësimin e gjyqtarëve dhe prokurorëve dhe verifikimin e pasurive të tyre, me qëllim largimin nga sistemi të personave të korruptuar.
