Prokuroria e Tiranës ka nisur hetimin kryesisht ndaj institucionit të Inspektoratit të Lartë të Deklarimit dhe Kontrollit të Pasurive dhe Konfliktit të Interesave që drejtohet nga Shkëlqim Ganaj.
Sipas Prokurorisë, hetimi bëhet për mosveprim të ILDKP për pasurinë e zyrtarëve.
Procedimi u regjistrua me iniciativë nga prokuroria, pas informacioneve mediatike se në tre vjet nuk është bërë asnjë kallëzim apo referim në organin e akuzës për fshehje të të ardhurave apo për mosdeklarim të pasurisë nga persona që kanë për detyrim ta deklarojnë atë.
Menjëherë pas regjistrimit të procedimit, dy oficerë të policisë gjyqësore kanë mbërritur në ILDKP për të sekuestruar praktikat e tre viteve të fundit.
Nga ana tjetër, kryeinspektori Ganaj iu është kundërvënë prokurorëve për pushimin e kallëzimeve penale për fshehje pasurie ndaj gjyqtarëve, por asnjëherë nuk ka përmendur nominalisht kryeprokurorin.
Ganaj nga ana tjetër ka bërë mbi dy mijë kërkesa në Hipotekë për të hetuar pronat e prokurorëve dhe gjyqtarëve.
Roli i Ganajt në krye të këtij institucioni, jo pak herë është kritikuar nga opozita, për anshmëri politike.
Ndërkaq, sipas ligjit për rivlerësimin e gjyqtarëve dhe prokurorëve, Inspektorati i Lartë i Deklarimit të Pasurive dhe Konfliktit të Interesit ka rol kryesor, në procesin e vettingut.
