Ish-kryeministri sali Berisha ka folur sot në Parlament për mbylljen e emisionit investigativ “Publicus”, duke thënë se u bllokua me urdhër të kryeministrit Edi Rama.
Berisha tha se 17-vjeçari Ardit Gjoklea, që u vra në landfillin e Sharrës disa javë më parë, u vra për së dyti, duke bllokuar emisionin investigativ.
“Sot, do doja të hapja fjalën me atë që është akti më i shëmtuar dhe më i paprecedentë në këto 24 vite: Kasaphana e fjalës së lirë. Për herë të parë në 24 vite, një emision investigativ për një çështje jashtëzakonisht të rëndësishme, që verifikohet si vrasje e mirëfilltë shtetërore,nuk e them me dashje, se ka dy lloje, vrasje me dashje dhe pa dashje, por Ardit Gjoklea ishte vrasje shtetërore.
Një 17-vjeçar që përballet me aspektet më të vështira të jetës në këtë vend. Pasi dështuan që ta varrosin me plehra, bënë gjithçka që ta vrasin për së dyti: të bllokojnë emisionin e tij. Kjo është vepër e mirëfilltë e Edi Kristaq Ramës, se këtë akt nuk e bën kush veç atij që ka fuqinë e ekzekutivit. Kjo është dëshmi e qartë sesi paratë e krimit po sundojnë çdo ditë! Por, e para është fjala, në libra të shenjtë dhe libra të tjerë!”
Berisha tha më tej se si kryeministri Edi Rama, por ministrat nuk e kanë përmendur kurrë emrin e 17-vjeçarit të vrarë.
Ish-kryeministri ka kërkuar hetime edhe nga prokuroria si për vdekjen e Arditit, por edhe për mbylljen e emisionit “Publicus”.
