Kryebashkiaku Erion Veliaj iu desh 24 orë që të reagonte për akuzat ndaj tij se ka ndikur në mbylljen e emisionit “Publicus” në Vizion Plus. Me anë të një deklarate për mediat, Veliaj provokon sërish gazetarët duke i thënë se pret një rast të tretë për akuza të tilla.
” Jam informuar dje nga një deklaratë e Partisë Demokratike dhe mediat e koordinuara prej saj me akuzat e radhës – tanimë thuajse të përditshme – kësaj here për një emision të patransmetuar në Vizion Plus. Unë do të shqetësohem realisht kur të vijë dita që PD e portalet e saj të mos sulmojnë – aty do kuptoj se s’kemi punuar mjaftueshëm atë ditë e që duhet të përpiqem më shumë! Por, për sa kohë batareja e ligësise nuk ndalet, atëherë jemi në rrugë të mbarë!”– shprehet me indiferentizëm kryebashkiaku Veliaj i cili lë të kuptohet se kush e investigon do të çensurohet.
Më herët, në muajin gusht, Drejtoresha e A1 News, Alida Tota u shkarkua nga puna për shkak se ajo po investigonte vdekjen tragjike të 17-vjeçarit Ardit Gjoklaj. Asokohe të gjitha dyshimet të çonin se kryebashkiaku Veliaj ishte dora e errët që ndikoi në shkarkimin e gazetares Tota si dhe mbylljes së investigimit. Por kjo situatë u përsërit sërish, duke mbyllur emisionin “Publicus” të dielën në orën 20:10, pak minuta përpara se të transmetonte emisionin “Kodrina e Vdekjes” dhe që zbardhte detajet e vdekjes së Ardit Gjoklajt.
“Tani, ju lutem, na lini të punojmë, ndërsa ju vazhdoni avazin tuaj të shpifjeve dhe sulmeve si çdo ditë këto 13 muaj. Me shpresë, tek e treta e vërteta – pra, te humbja e ardhshme – do kuptoni se kjo kulturë e shëmtuar nuk solli dobi as për ju, se për vendin jo e jo! Puna or miq, ju nxjerr në dritë, jo çezma e helmit, sajesave e trillimeve! Ju vazhdoni me stërkëmbshat, por ju’a them fort e qartë: TIRANA NUK NDALET!”- shton me cinizëm Veliaj.
Kryebashkiaku i Tiranës tenton të sfidojë gazetarët duke u thënë të gjejnë një provë që ai ka mbyllur emisionin “Publicus” ndërkohë që nuk merr as mundimin ti përgjigjet dhjetra kërkersave për informacion që dërgohen pranë këtij institucioni. Pra, ai bën lojëra fjalësh por në fakt sipas studimeve të Komisionierit për të Drejtën e Informimit, Bashkia e Tiranës është institucioni më i errët dhe më pak transparenti.
“As nuk e kam parë emisionin, as nuk i njoh gazetarët, e as kam kontaktuar KURRË me Vizion Plus. Sfidoj këdo që bën gazetari të mirëfilltë të provojë të kundërtën!”– deklaron kryebashkiaku duke pretenduar në mënyrë absurde se investigimi i gazetarëve në Vizion Plus ishte organizuar nga Partia Demokratike.
Nga Boldnews.al
