Fushata e kreut të Bashkisë së Tiranës, Erion Veliaj, për këndet e lodrave për fëmijë që po krijon në lagjet e kryeqytetit po përdoret prej tij për t’i bërë reklamë edhe biznesit privat.
I cilësuar prej kreut të Bashkisë si këndi i katërt më i madh në Tiranë, ai që u hap vetëm pak ditë më parë në zonën e “Brrylit” pranë Maternitetit të Ri, aty që prej ditës së inaugurimit e deri më sot qëndrojnë dy banderola të mëdha të pijes freskuese Coca-cola.
Edhe në tabelën hyrëse të këndit të lojërave ku është vendosur një stendë me dy foto të mëdha që tregon si ishte më parë vendi ku u bë këndi i lodrave dhe si u transformua, përbri logos së Bashkisë së Tiranës është edhe ajo e Coca-cola.
Kjo firmë ka kontribuar për këndin e lodrave dhe tashmë Veliaj po e shpërblen me reklamë falas duke dëmtuar fëmijët. Në kohën kur mjekët bëjnë u bëjnë apel prindërve që të mos i lejojnë fëmijët të përdorin pije të tilla jo vetëm për shkak të përmbajtjes së kafeinës, por edhe obezitetit, Veliaj bën pikërisht të kundërtën.
Nga ana tjetër, reklama të tilla nuk janë të lejuara të vendosen në ambiente të tilla publike veçse atyre të përcaktuara nga pushteti vendor ku ato paguajnë edhe taksën e tabelës.
Pijet e gazuara janë një ndër ushqimet nga të cilat fëmijët duhet të heqin dorë me patjetër. Të mbushura me sheqer, substanca kimike dhe zakonisht me zero vlera ushqyese, studime të ndryshme kanë vërtetuar se këto pije kanë efekte shumë të dëmshme për shëndetin e fëmijëve.
Ekspertët japin disa nga arsyet përse fëmijët nuk duhet t’i pinë ato. Së pari, pijet e gazuara krijojnë varësi. Vetitë vartëse të pijeve të gazuara vijnë nga përbërësit e tyre, sidomos kafeina. Kafeina krijon një varësi fizike dhe fëmijët nuk janë imunë ndaj saj. E njëjta gjë ndodh edhe me ëmbëltuesit artificial dhe sheqerin, i cili krijon varësi te fëmijët.
Arsyeja tjetër është se dëmtojnë trurin e fëmijëve që është në zhvillim gjatë gjithë adoleshencës. Kur një fëmijë pi shumë pije të gazuara, ai merr substanca kimike që ndryshojnë trurin. Gjithashtu pijet e gazuara dobësojnë kockat e fëmijëve, u shkatërrojnë dhëmbët dhe mund të shkaktojnë edhe diabet që në fëmijëri. Ndër të tjera, fëmijët që konsumojnë këto pije mund të kenë probleme me mbipeshën.
Sipas studimeve, po të pish vetëm 600 ml pije të gazuara në ditë, mund të shtosh rreth 12 kg në vit. Pijet e gazuara u rrisin fëmijëve riskun për t’u prekur nga sëmundjet e zemrës, ndërsa krijojnë edhe probleme me tretjen. Ndër të tjera, pijet me gaz shkaktojnë agresivitet të fëmijët për shkak të përmbajtjes së kafeinës, sheqerit apo ngjyruesit artificialë.
Gjatë një studimi të kryer te një grup fëmijësh, u arrit në përfundimin se ata që konsumonin më shumë pije të gazuara ishin më agresivë, më të mbyllur dhe kishin probleme me përqendrimin.
(Boldnews)
