Ministri i Brendshëm, Saimir Tahiri, i ftuar në emisionin Top Story, në Top Channel për të justifikuar dështimin e policisë në ndalimin e trafikut të drogës ka lëshuar për një perlë të radhës.
Tahiri tha se edhe avionët me drogë që kanë rënë në vendin tonë në fakt janë shprehje e suksesit të policisë për të luftuar rrugët tradicionale të trafikimit.
“Më përmende avionët që i thyhet rrota. Nuk dua të jem cinik, por nuk e kuptoj këtë mediokritet kolektiv lidhur me këto fenomene, në çdo vend të botës, sidomos në luftën kundër kanabisit, të shkatërrosh më shumë është sukses. Në Itali vjet ka qenë gati 50 për qind më shumë hapësira e kultivuar në raport me 2014, këtë vit është më shumë dhe po kështu në të gjithë rajonin. Ky mediokritet bëhet akoma më i madh kur përmenden avionët. Në të gjithë shkencën e studimit të këtyre fenomeneve ky konsiderohet një sukses i policisë për të luftuar rrugët tradicionale të trafikimit. Pra, nëse ju nuk do të shikonit atë avionin, si rrugë ekstreme e trafikimit, me plot të drejtë do të mendonit se këtu kalon nga Porti i Durrësit, nga Aeroporti i Rinasit”, tha Tahiri.
Pra, sipas Tahirit trafikimi me avionë është sukses i policisë shqiptare dhe jo një gjetje e trafikantëve, të cilët në këtë mënyrë jo vetëm që transportojnë më shumë drogë, por dhe kalojnë pa u vënë re nga policia shqiptare.
Imagjinoni që një deklaratë të tillë ta kishte bërë një homolog i Tahirit në një nga vendet e Bashkimit Europian. Sepse vetëm në vendin tonë rrëzohen avionë me drogë, dhe vetëm kur avionët rrëzohen, policia shqiptare arrin ti kapë. Por nuk kemi dëgjuar ndonjë rast tjetër që policia të ketë parandaluar trafikun e drogës me avion.
Por ministri Tahiri sonte ka bërë edhe një autogol tjetër.
Me gjithë shifrat e dhëna nga GDF, sipas ministrit të Brendshëm, kanabisi nuk është problemi më i madh i shqiptarëve, por janë varfëria papunësia dhe mungesa e drejtësisë.
“Kanabisi nuk është problemi më i madh i shqiptarëve, është varfëria, papunësia, mungesa e drejtësisë. Unë, ndryshe nga opozita, nuk i quaj dot narkotrafikantë qytetarët që nga halli dhe për t’i mbijetuar varfërisë mbjellin kanabis. I quaj njerëz që 20 vjet nuk ia ka zgjidhur hallet politika”, tha Tahiri.
Atëhere shtrohet pyetja, po qeveria “Rama” përse është në detyrë kur njerëzit nga varfëria po i drejtohen rrugës së drogës. Cilat janë politikat e punësimit të qeverisë? Siç duket ministri i Brendshëm nuk i ka lexuar deklaratat propagandistike të shefit të qeverisë se vendi me anë të reformave po ecën përpara.