“Publicus” është investimi profesional i një grupi reporterësh që do të hulumtojnë për të hedhur dritë mbi aferat korruptive, shpërdorimin e fondeve publike, krimin e organizuar si dhe padrejtësitë shoqërore.
Një përvojë direkte në vendngjarje mbi ndodhi e situata të rëndësishme të aktualitetit që tërheqin kureshtjen e publikut, brenda të cilave marrin jetë personazhe me profile komplekse, histori të pazakonta që përcjellin emocione të gjalla e rrëfime ekskluzive.
Bërthama kryesore e këtij grupi që punon vetëm në terren ka qënë sezonin e shkuar pjesë e emisionit “Të Paekspozuarit” në Ora News. I njëjti ekip me prurje të reja dhe me përforcime cilësore ka ndërmarrë sfidën e re për zhvillimin e një cikli dokumentarësh investigativ në Vizion Plus.
Emisioni i parë nisi me “Matura në kaos” kur për herë të parë u zbulua dështimi i institucioneve për të garantuar të drejtën e studimit për maturantët e këtij viti.
Ndërkohë këtë javë vjen “Riciklimi”, një material filmik i veçantë me një trajtim të thellë e të plotë me atë se çfarë po ndodh me sulmin që po i bëhet mjëdisit në Shqipëri me ligjin e ri për importin e mbetjeve…Cilat janë prapaskenat e këtij ligji dhe dritëhijet mbi kapacitetet e Shqipërisë për të importuar mbetje të riciklueshme? Një seri intervistash, dokumentash dhe zbulimesh ekskluzive do të transmetohen për këtë çështje këtë të dielë në orën 20:10, në Vizion Plus.
Por sëshpejti në “Publicus” pritet të shfaqen materiale filmike që do të shkaktojnë reagime të forta qytetare duke sjellë edhe një risi profesionale në mediat shqiptare. Protagonistët shprehen me modesti duke mos dhënë ndonjë deklaratë mbi atë se ç’pritet nga ky format unik televiziv. Sipas tyre do jetë sezoni dhe teleshikuesit që do shprehen për punën e tyre.
Me eksperiencën 2-vjeçare tek “Të Paekspozuarit” mbi supe ky ekip do të investigojë përmes një përvoje të drejtpërdrejtë në vendngjarje, në prani të palëve, në kërkim të transparencës, në ndjekje të së vërtetës.
Qëllimi nuk është vetëm të informosh, por përmes raportimit në thellësi, të shpjegosh motivet e vërteta të aktorëve në skenën reale të jetës, të vendimmarrjes, të shpërndarjes së parave publike; të tregosh paaftësinë dhe indiferencën kriminale e të denoncosh përfitimet e pamerituara të plutokracisë në kurriz të shoqërisë e pasurisë publike.
Pra, “Publicus” do t’i shërbejë qytetarëve për zgjerimin e kapaciteteve reaguese…
