Prokuroria e Krimeve të Rënda ka pushuar akuzat për trafik ndërkombëtar droge dhe grup kriminal ndaj 7 personave.
Mes tyre, mes tyre është vëllai i Besnik Sulajt i njohur si “Beso” i Taivanit, por edhe disa biznesmenë të tjerë.
Kjo zbutje e akuzës vjen vetëm një vit pas arrestimit të bujshëm të shtatë të akuzuarve.
Ajet Sulaj, Pajtim Braçaj, Valter Pashollari, Bejto Kotaj, Festim Xhelilaj, Qerim dhe Lutfi Xeka, u arrestuan me 700 kg hashash dhe një laborator droge në Durrës para një viti, ndërsa tashmë akuza ndaj tyre përfundon në posedim të lëndës narkotike.
Në këtë mënyrë dosja ka përfunduar në prokurorinë e Durrësit, ndërsa prokuroria ka shënuar skandalin e saj të radhës.
Aq më tepër që ky vendim ka ngritur edhe dyshime të shumta.
Vendimi i pushimit të akuzave nuk është bërë nga prokurori që urdhëroi arrestimin, por nga drejtuesi i institucionit të akuzës, ç’ka ngre dyshime se prokurori i çështjes nuk ka qenë dakord me vendimin e titullarit të institucionit, raporton Abc News.
Si u zbulua grupi dhe rolet e të arrestuarve
Hetimet për goditjen e këtij grupi kriminal kishin nisur që më 25 shtator të vitit të kaluar nga Prokuroria e Krimeve të Rënda, çka solli arrestimin e tyre një muaj më pas.
Në akuzën e saj, Prokuroria deklaronte se këta persona akuzohen për trafik narkotikësh, pasi gjatë muajve qershor-korrik 2015, e në vazhdim, kishin grumbulluar sasi të mëdha lënde narkotike, kryesisht të llojit kanabis sativa, e cila magazinohej në qytetin e Shkodrës, në objektin e Bejto Kotaj për qëllime të trafikimit jashtë vendit.
Qerim Xeka mblidhte lëndë narkotike kanabis të papërpunuar në fshatrat e Krujës, ndërsa Bejto Kotaj siguronte lëndë narkotike kanabis në zonën e Shkodrës.
Ajet Sulaj siguronte hashashin në tri drejtime, së pari në zonën e Jugut, në zonën e Krujës te personi i dyshuar Qerim Xeka, në zonën e Shkodrës te Bejto Kotaj.
Në gjetjen dhe transportimin e lëndës narkotike Qerimi ndihmohej nga djali i tij Lutfi Xeka dhe Bejto Kotaj.
Sipas akuzës së prokurorisë, Ajet Sulaj organizonte transportin e saj nëpërmjet personave nën hetim Naim (alias Festim) Xhelilaj dhe Pajtim Braçaj.
Transportimi i lëndës narkotike bëhej duke u shoqëruar në distancë nga një automjet tjetër nga Pajtim Braçaj ose Ajet Sulaj. Droga dërgohej në një vilë dykatëshe në afërsi të Porto Romano në Durrës. Në këtë shtëpi lënda narkotike vendosej në ambiente të ndryshme dhe përpunohej për t’u paketuar.
Shtëpia ku grumbullohej lënda narkotike mbahej në mbikëqyrje nga personat e dyshuar Valter Pashollari dhe Euglen Pashollari. Kontaktet me mbikëqyrësit e shtëpisë ku grumbullohej lënda narkotike mbaheshin nga personi nën hetim, Ajet Sulaj.
Akuza deklaronte se më 15 tetor, një nga mbikëqyrësit e vilës, ka dërguar një mesazh se ishin gati 30 pako të përpunuara, të cilat mund të largoheshin nga vila. Një ditë më pas, policia ndërhyri dhe arrestoi në kohë dhe vende të ndryshme të pandehurit. Në banesë u gjetën rreth 700 kilogramë hashash.
Pavarësisht këtyre pretendimeve të akuzës, pas 10 muajve, Prokuroria thotë se nuk provohet trafiku ndërkombëtar i drogës dhe për këtë fakt dosja kalon nga Krimet e Rënda tek prokuroria e Durrësit me akuza më të zbutura.
