Që shëndetësia shqiptare është e mbushur plot me skandale e tregoi më së miri rastin e sotëm kur në maternitetin “Koço Gliozheni”, një nënë 35-vjeçare dhe foshnja e saj kanë ndërruar jetë në spital brenda pak orësh.
Vdekja e tyre erdhi pikërisht nga paaftësia qeverisëse e ministrisë së Shëndetësisë.
Familjarët treguan se nëna nuk mori ndihmë mjekësore nga mjekët, dhe për ta bërë më të rëndë situatën, urgjenca ishte e mbyllur dhe kirurgu u vonua plot dy orë.
Nga Ministria e Shëndetësisë nuk ka pasur asnjë deklaratë për këtë skandal, por është mjaftuar vetëm një deklaratë e thatë nga drejtoresha e maternitetit “Koço Gliozheni” se do pritet ekspertiza mjeko-ligjore.
Ndërkohë që për akuzat e familjarëve nuk ka pasur asnjë sqarim si nga materniteti ashtu edhe nga ministria, duke e kaluar këtë ngjarje të rëndë në heshtje.
Por ashtu siç ndodh rëndom tashmë ka menduar kryeministri Edi Rama të mbulojë skandalet e vartësve të vet.
Për kryeministrin kjo ngjarje e rëndë duket se nuk ka ndodhur. Madje ai ka gjetur rastin të bëjë sërish propagandë duke vlerësuar ministrin më të akuzuar të kësaj qeverie, Ilir Beqjan.
Në një takim në fshatin Gruemirë të Shkodrës, ku foli për Fondin Kombëtar të Garancisë për bujqësinë, Rama përfitoi të vlerësonte edhe Ilir Beqjan, duke vënë në dukje investimet Ministrisë së Shëndetësisë.
Sipas Ramës, sot Shkodra është qyteti i dytë në Shqipëri pas Tiranës që bën ndërhyrje në zemër, ndërkohë që theksoi se nga investimet qeveritare gjendja shëndetësore në vend ka ndryshuar.
Në fakt, ndryshimi i shëndetësisë në vendin tonë u duk sot, kur nëna dhe foshnja humbën jetën, por për kryeministrin ky është një fakt që duhet anashkaluar, pasi nuk ka të shpjegojë ndryshe miliona eurot që janë hedhur në shëndetësi që janë përfituar vetëm nga miqtë e tij dhe të ministrit të Shëndetësisë.
