69-vjeçari Guido Guidi i cili u rrëzua me avion në zonën e Ishmit ka pranuar mbrëmë gjatë marrjes në pyetje nga prokurorët, se kishte ardhur në Shqipëri për të kryer trafik ndërkombëtar droge.
“Gazeta Shqiptare” zbardh sot deponimin në orët e vona të pilotit italian i cili ka pohuar se trafikantë shqiptarë dhe italianë me bazë në Milano e kishin porositur fluturimin e tij.
“Erdha fillimisht për të parë zonën ku do të realizonim transportin. Më ka dërguar grupi i Milanos (u tregon prokurorëve emrat e shqiptarëve dhe italianëve) për të parë zonën ku do të realizonim transportin. Fillimisht unë u nisa nga Milano dhe i lashë ata në Bari. Aty më dhanë edhe hartat e duhura dhe instruksionet e tjera për të ulur në Shqipëri. Erdha për të parë pistën, do vijë një herë tjetër për të marrë rreth 200 kilogramë hashash”, i ka thënë grupit hetimor piloti i avionit, Guido Guidi.
Pavarësisht se pranoi se kishte ndërmend të bënte trafik droge, piloti është liruar mbrëmë në rrethana të paqarta. Burimet folën për një marrëveshje ku Guidi ka treguar të gjithë emrat e shqiptarëve dhe italianëve të përfshirë në trafik. Megjithatë, lirimi i tij i beftë lë shteg për dyshime.
Pas uljes së avionit “Piper”, i cili po fluturonte pa leje nga Aviacioni Civil, Prokuroria e Krimeve të Rënda ka nisur hetimet për këtë rast, nën akuzën e trafikut të narkotikëve. Piloti Guido Andrea Guidi është marrë në pyetje nga prokurorët e Krimeve të Rënda, pasi dyshohet për trafik narkotikësh, megjithëse nuk është gjetur drogë në vendngjarje.
Kur është pyetur fillimisht se pse nuk njoftoi autoritetet në lidhje me ngjarjen, italiani ka deklaruar se nuk e ka bërë një gjë të tillë, pasi nuk kishte marrë leje fluturimi. Sakaq, edhe përfaqësues të Aviacionit Civil Shqiptar pohuan se avioni që ra në Ishëm nuk ka pasur leje fluturimi.
