Kreu i opozitës, Lulzim Basha ka pranuar humbjen në Dibër, por tha se PD humbi para kartelit të drogës dhe korrupsionit.
“Karteli i drogës e fitoi këtë betejë, por zbuloi skemën para Dibrës. Fatkeqësisht në këtë përballje fitoi karteli i krimit. Humbi Shqipëria, humbi politika e ndershme, humbi liria, dinjiteti njerëzor dhe vlerat evropiane. Humbën dhe të varfrit që u trembën. Në Dibër humben dhe ata që votuan për Muharrem Ramën. Të vetmit fitues në Dibër ishin, pushteti abuzues i Edi Ramës dhe krimi i lidhur me të.”- deklaroi Basha.
Ai theksoi se karteli i drogës dhe korrupsionit shfrytëzoi varfërinë dhe humbjen e shpresës tek qytetarët dhe iu rrëmbeu votën. Por Basha deklaroi se do të luftonte për lirinë e tyre.
“Sot ne humbën para kartelit të drogës, të krimit dhe korrupsioni. Ky kartel shfrytëzoi varfërinë dhe humbjen e shpresës për t’iu rrëmbyer votën. Dikujt me para, dikujt me presion. Ne e kuptojmë këtë situatë. Ata e kanë humbur shpresën tek politika dhe thonë më mirë një thes me miell sot se premtime që nuk mbahen. I kuptoj të gjithë ata që zgjodhën të votojnë të keqen. Iu premtoj se do të luftoj edhe për lirinë e tyre nga varfëria. Do të luftoj që jeta e tyre të mos varet nga frika. Bëmë më të mirën që mundëm gjatë kësaj fushate. Zgjodhëm një kandidat të shkëlqyer. Dua ta falënderoj për kontributin e tij, përpjekjen e tij, kurajën e tij. Bëmë fushatë dinjitoze, folëm shtruar, hapur për të gjithë. Dua t’i ftoj të gjithë të reflektojnë dhe të shohin përpara. Të fillojmë të punojmë që Dibra të mos jetë akti i parë i dramës që Edi Rama po përgatit për zgjedhjet parlamentare”, tha Basha.
Ai deklaroi më tej se PD dhe ai në krye i kanë shpallur luftë kartelit të drogës duke ftuar çdo shqiptar t’iu bashkohet. “I shpallim luftë totale kartelit të drogës, krimit dhe korrupsionit me shumë besim se ardhmja është në duart tona. Demokratët në krye të kësaj lufte dhe unë në krye të tyre. Çdo shqiptar është i thirrur të na bashkohet. Do fitojë Shqipëria demokratike dhe evropiane”, tha Basha.
