Mbi 100 policë italianë të angazhuar për një operacion anti-drogë në Rimini, ku janë arrestuar edhe 5 shqiptarë.
Operacioni i koduar “Life Style” vuri në pranga shqiptarët: Xhevdet Zaimi, Erion Zaimi, Eris Hajdari, Denis Muça dhe Redi Gjuraj.
Shqiptarët dyshohet se kanë furnizuar për një kohë të gjatë një grup kriminal në Rimini me kokainë. Shqiptarët e merrnin kokainën në Holandë dhe më pas ia shisnin itlaianëve. Negociatori i drogës është Denis Muça, sipas mediave italiane.
Gjithashtu, janë lëshuar edhe 17 urdhërarreste të tjera për grupin e strukturuar kriminal. Në këtë operacion janë përfshirë mbi 100 policë.
Hetimi kishte nisur në fillim të këtij viti, kur në shënjestër të hetuesve u vu një person nga Rimini, Sonny Righeti, së bashku me të fejuarën e tij Dalila Laricchia dhe me trajnerin personal Andrea Lampredi për substanca dopingu.
Të tre këta persona sipas policisë së Riminit furnizonin me Wistrol, Rexocin dhe Trenbolone të pasionuarit pas formave fizike, duke i dhënë edhe këshillat se si t’i përdornin substancat e ndaluara.
Duke ndjekur fillin e dopingut, hetuesit arritën të zbulojnë një linjë të shpërndarjes së kokainës që përdorte çiftin italian, Righeti dhe Laricchia për t’u futur në botën e diskotekave.
Një seri përgjimesh telefonike kanë lejuar që të mbërrihet tek trafikantët e mesëm e më pas tek importuesit e diskotekave që e sillnin drogën nga Holanda.
