Taulant Balla është emri që pritet të zëvendësojë Saimir Tahirin në drejtimin e Ministrisë së Brendshme.
“Boldnews.al” ka mësuar nga njerëz të afërt të deputetit nga Librazhdi se tashmë kanë nisur përgatitjen për përzgjedhjen e emrave që do të shoqërojnë Ballën në stafin e tij të ngushtë. Gjithashtu, po diskutohet edhe lista e drejtorëve të Policisë, të cilët mund të ndryshohen me ardhjen e ministrit të ri në krye të institucionit.
Emri i Ballës si kandidat i mundshëm për postin e Ministrit të Brendshëm u diskutua edhe një vit më parë. Në përfundim të zgjedhjeve lokale, ndërmjet aleatëve kryesorë qeverisës, PS-LSI, pati një ftohje të madhe. Burime të larta nga LSI shpreheshin në atë kohë se thyerja brenda koalicionit kishte emrin “Saimir Tahiri”. Ministri i Brendshëm mendohet se ka punuar për të goditur drejtuesit kryesorë të LSI-së së Ilir Metës. Dhe ky i fundit, kërkonte me ngulm largimin e Tahirit nga qeveria.
Por, Saimir Tahiri në vazhdimësi ka marrë mbështetjen e kryeministrit Edi Rama, pavarësisht se ai është ministri i tij më i goditur nga aleati qeverisës dhe sidomos nga Partia Demokratike në opozitë.
Kur nisën përplasjet PS-LSI, në shtator 2015, Taulant Balla u përgatit të zëvendësonte Tahirin në krye të punëve të Brendshme. Por, kryeministri Rama u rezistoi presioneve të LSI-PD dhe e mbrojti me fanatizëm Tahirin, pavarësisht se situata kriminale është përkeqësuar ndjeshëm.
Mesa duket, disa muaj para zgjedhjeve, kryeministri Rama ka vendosur të zbusë aleatin e tij, Metën, duke i plotësuar dëshirën për të larguar Saimir Tahirin nga drejtimi i Ministrisë së Brendshme. Dhe, emri që tashmë duket se është zgjedhur, është Taulant Balla. Ky i fundit, krahas faktit se është njeri i besuar i Ramës, ka shërbyer edhe si urë komunikimi ndërmjet kryeministrit dhe deputetit Tom Doshi, gjatë periudhës kur këta të fundit ndërprenë komunikimin me njëri-tjetrin.
Pra, emërimi i mundshëm i Taulant Ballës në krye të Ministrisë së Brendshme pritet të rikthejë fuqishëm në jetën aktive politike edhe deputetin e Shkodrës, Tom Doshi. Lëvizjet e Ramës duket se janë të gjitha në funksion të zgjedhjeve të vitit të ardhshëm.
Largimi i Saimir Tahirit nga Ministria e Brendshme zbut Ilir Metën. Në krye të punëve të Policisë vendos një tjetër njeri të afërt të tij, Taulant Ballën, i cili ka mbështetjen edhe të Tom Doshit. Dhe, Doshi do të vijojë të japë kontributin e tij për socialistët në Shkodër, zonë ku të majtët u rrëzuan keqas në zgjedhjet lokale të vitit të kaluar.
Po Saimir Tahiri? Është e sigurt që kryeministri nuk do ta hedhë në rrugë të madhe. Ai pritet të emërohet në postin e ministrit të një dikasteri që aktualisht mbahet nga Partia Socialiste. Ditët e ardhshme pritet të konfirmojnë zyrtarisht këto lëvizje, të cilat nisën ditën e premte, me largimin e Edmond Haxhinastos të LSI nga posti i ministrit të Transporteve.
Ndërkohë, pritet të konfirmohen edhe diskutimet nën zë për largimin e Ylli Manjanit nga Ministria e Drejtësisë. Ende është e pakonfirmuar, por ka informacione se edhe ministri i Energjetikës, Damian Gjiknuri, mund të ndërrojë zyrë ministrore.
(Boldnews.al)
