Presidenti Bujar Nishani ka mbledhur në një takim tre krerët e grupeve parlamentare, PS, PD, LSI dhe PR për t’u konsultuar mbi përzgjedhjen e anëtarëve të Këshillit të Emërimeve në Drejtësi në mungesë të ligjit të pamiratuar ende nga parlamenti.
Sipas njoftimit zyrtar të presidencës, të pranishëm në takim Gramoz Ruçi, Edi Paloka, Luan Rama dhe Fatmir Mediu shprehën vlerësimin dhe mbështetjen ndaj Presidentit të Republikës për angazhimin e tij maksimal në zbatim të plotë të Kushtetutës dhe ruajtje të autoritetit e kompetencave kushtetuese, si dhe parashtruan idetë dhe qëndrimet e tyre për këtë çështje.
Kreu i Shtetit shqiptar, pasi i falënderoi përfaqësuesit e grupeve parlamentare për mendimet dhe pikëpamjet e paraqitura, vuri në dukje rëndësinë e zbatimit rigoroz të Kushtetutës dhe afateve ligjore, duke theksuar “domosdoshmërinë e zhvillimit të një procesi përzgjedhjeje me short të anëtarëve të Këshillit të Emërimeve në Drejtësi sa më të mirë të mundshëm dhe të gjykuar pozitivisht e të mirëpritur nga ligjbërësit”.
Presidenti Bujar Nishani një ditë më parë u shpreh pas takimit me me Konstitucionalistët se vendimet e institucioni të drejtuara prej tij do të jenë gjithnjë të bazuara në Kushtetutë dhe të mirë-argumentuara.
