Kreu i Kuvendit Ilir Meta ka ndryshuar qëndrim ndaj kreut të opozitës Lulzim Basha, të cili më parë e ka quajtur edhe gënjeshtar. Këtë gjë e ka konfirmuar gjatë një interviste nga Filadelfia, SHBA ku ai po merr pjesë në konventën e demokratëve. Por nga ana tjetër Meta tha se koalicioni i ka të gjitha mundësitë të mbyllë mandatin 4-vjeçar.
“Qëndrimi im si kryetar i parlamentit ka qenë vetëm një, konsensus sipas Venecias dhe nëse opozita nuk do ta pranonte ne do të votonim edhe pa opozitën. Opozita kishte të drejtë për rekomandimin 88, u binda, pasi u takova me Bashën, qëndrimin u kanë shprehur edhe të huajve, pasi e kam konsultuar me ekspertët më të mirë në SHBA. Me ardhjen e Nuland dhe ndërhyrja e Hahn dhe ambasadorëve bënë të mundur një gjë që nuk ishte besuar. Në rast se do miratohej pa konsensus unë s’do isha më kryetar Kuvendi. Shqipëria bën edhe pa Bashën, Metën e Ramën. Shqipëria nuk bën dot hap para pa konsensus e bashkëpunim dhe dialog”, deklaroi Meta.
Kreu i Kuvendit tha gjithashtu se parlamenti mund të mblidhet duke filluar që nga e enjtja për të miratuar 7 ligjet e paketës së ndryshimeve kushtetuese.
“Jam në kontakt me sekretaren e përgjithshme të kuvendit, ambasadoren e BE dhe besoj se kjo është e mundur që të enjten të mblidhet kuvendi për miratimin e 7 ligjeve që reforma të zbatohet. Parlamenti do mblidhet në cdo moment që ne do ta vlerësojmë të rëndësishëm me gjithë aktorët për cështjen e reformës. I ftoj anëtarët e komisionit të posaçëm që të fillojë puna për të gjitha ligjet. Politikanët do të shkojnë e të përgjigjen para drejtësisë, kjo është e qartë. Nuk bëhet reformë në drejtësi duke i thënë kundërshtarit që do shkosh në burg. Por politikanët duhet të thonë të parët se vetë do shkojnë në burg”, theksoi Meta.
Përsa i përket dyshimeve për një krisje të mundshme të koalicionit, Meta tha se nuk ka arsye që PS-LSI të mos e mbyllin këtë mandat, duke shtuar se është i gatshëm të japë sqarime për qëndrimet e tij edhe në grupin e PS.
“Nuk duhet të ngatërrojmë qëndrimet për reformën në drejtësi me qëndrimet e koalicionit. Unë dua t’i siguroj gjithë socialistët se unë jam njeri që i qëndron fjalëve, marrëveshjeve. Politika jonë është e ngatërruar me thashetheme. Unë jam gati të shkoj në grupin parlamentar të PS që të sqarojmë për çështjet për përmirësimin e qeverisjes. Nuk duhet të përziejmë asnjëherë çështjet e shtetit me çështjet politike. Unë besoj se koalicioni ka mundësitë që ta mbyllë këtë mandat, të përmbushë akoma më mirë pritshmëritë dhe jemi të angazhuar për këtë çështje dhe nuk i shoh këto dy çështje me njëra-tjetrën sepse nuk duhet të deformojmë këtë reformë të arritur historike”, u shpreh Meta.
Ai vlerësoit zotin Basha për qëndrimin e tij për reformën. “Unë mund të kem thënë gjatë fushatës që zoti Basha gënjen edhe për orën por për hir të së vërtetës, fjalën që Basha më ka dhënë në takim për reformën, se në rast se 88 do plotësohej ai e PD do e mbështesnin reformën, ai e ka mbajtur plotësisht. Kjo është pozitive e duhet vlerësuar. Ai duhet të tregojë se është lidership i ri”, deklaroi Meta.
