Afrimi politik mes kryeparlamentarit Ilir Meta dhe Kryetarit të Partisë Demokratike Lulzim Basha është parë qartë kohët e fundit. Të dy, ata pritet të takohen në Uashington pasi janë të ftuar në Konventën e Demokratëve ku do të zyrtarizohet kandidatja Hillary Clinton.
Kreu i Kuvendit, Ilir Meta pasditen e djeshme udhëtoi drejt Shteteve të Bashkuara të Amerikës për një vizitë 4-ditore. Ai do jetë pjesë e të ftuarve, përfaqësues të lartë të politikës, që marrin pjesë në ceremoninë e demokratëve. Për Metën ky do të jetë një rikthim i shpejtë në SHBA, pasi kujtojnë se pak javë më parë ai ishte në Uashington, ku pati takim në Departamentin e Shtetit. Në SHBA mësohet se Meta do të qëndrojë 4 ditë, ku pritet të zhvillojë takime të ndryshme. Kreu i Kuvendit udhëton për herë të tretë radhazi drejt Amerikës vetëm në një kohë të shkurtër brenda pak muajve. Por mësohet se drejt SHBA-ve niset sot edhe kreu i PD-se, Lulzim Basha dhe do të marrë pjesë në konventën e demokratëve.
Vizita e Metës dhe e Bashës në SHBA vjen pak ditë pasi u miratua reforma në drejtësi. Disa ditë më parë u miratua reforma në drejtësi, ndërkohë që sot Kuvendi i Shqipërisë do të miratojë projektligjet e fundit, përpara se deputetët të marrin pushimet.
