Pa debate ka nisur sot seanca e fundit për këtë sesion parlamentar në Kuvendin e Shqipërisë. Deputeti Ervin Bushati ftoi palët politike që të zgjasin periudhën e konsensusit në të mirë të qytetarëve. E menjëhershme ishte dhe përgjigja e kolegut të tij demokrat, Edi Paloka, i cili theksoi se opozita ka mbështetur gjithmonë projektligjet që kanë të bëjnë me qytetarët, ndaj ftoj qeverinë që të mbajë premtimet për reformën në drejtësi.
Seanca plenare ka në rendin e ditës 8 pika, midis të cilave dy marrëveshje konçesionare, ndryshime në kodin penal dhe ligji për rivlerësimin e pasurisë. Drejtuesja e seancës plenare të Kuvendit, Valentina Leskaj në nisje të punimeve të seancës njoftoi se Komisioni parlamentar po vijon punën për 7 projektligjet që janë ligjet bazë dhe që e bëjnë të zbatueshëm projektin kushtetues, të votuar me unanimitet në parlament.
Paloka i kërkon qeverisë të mbajë premtimet për “drejtësinë”
Kryetari i Grupit Parlamentar të Partisë Demokratike, Edi Paloka shprehu angazhimin e opozitës për të miratuar çdo projektligj apo akt në interes të qytetarëve shqiptarë. Duke reaguar ndaj qëndrimeve të maxhorancës në seancën e sotme plenare, e cila përmes deputetëve Lutaj e Bushati vlerësoi vendimin e opozitës për bashkimin e votave me maxhorancën për miratimine refomës, në drejtësi, Paloka tha se ky ishte akti i fundit në vargun e gjatë të qëndrimeve konstruktive të opozitës, ndryshe nga si vepronte rilindja kur ishte në opozitë.
“Opozita ka votuar gjithnjë çdo p/ligj, çdo akt në interes të qytetarëve. Ky ishte qendrimi i fundit në këtë varg, ndryshe nga rilindja në opozitë që nuk votonte asnjë akt, apo ligj, apo reformë edhe kur ishte shume e qartë apo vihej nën presionin e ndërkombëtarëve, edhe kur ishte kërkesa për tre ligjet e famshme që nuk i votuat me justifikime absurde, si ai i qarkut të Fierit”, iu përgjigj Paloka qëndrimeve të maxhorancës.
Paloka i kërkoi maxhorancës të mbajë premtimet e bëra për zgjidhjen e problematikave me të cilat po përballen qytetarët sot. “Ju sot keni detyrimin që pas votimit të reformës të mbani fjalën e premtimet që ju keni dhënë qytetarëve se çdo problem i tyre do të zgjidhet”, theksoi Paloka. Sipas tij, kjo propagande e Ramës u bë për të hequr vëmendjen nga interesat e qytetarëve duke e fokusuar atë te reforma. Tani reforma u miratua. Uroj që shpejt tu tregoni qytetarëve që nuk i keni mashtruar. Tregoni se i keni patur seriozisht ato që keni thënë”, deklaroi Paloka, ndërsa shtoi se opozita gjithnjë do të miratojë çdo ligj në interes të qytetarëve shqiptarë.
Pas reagimit të Palokës, fjalën e mori drejtuesja e seancës, Valentina Leskaj e cila solli në vëmendje se maxhoranca e sotme edhe kur ishte në opozitë, gjithnjë ka bashkuar votat për miratimin e akteve ligjore që u shërbenin qytetarëve. “Nuk është e vërtet që si kemi miratuar nismat ligjore në interes të qytetarëve. Tre ligjet për statusin kandidat i kemi miratuar, Kodin Elektoral, por edhe Kushtetutën e kemi ndryshuar bashkë”, tha Leskaj.
Bushati kërkon zgjatjen e konsesusit
Deputeti i Partisë Socialiste, Ervin Bushati nga foltorja e Kuvendit pohoi se palët duhet të kenë një periudhë konsensusi të zgjatur dhe se ato duhet të bashkëpunojnë. Teksa u ndal tek projektligji për Koncesionin për minierën e kromit në Bulqizë, Bushati theksoi se rëndësi ka rritja e prodhimit dhe niveli zero i aksidenteve në punë.
Ja për çfarë do të votohet sot
Ne kete pakete përfshihet pr/ligji “Për Gjykatën Kushtetuese”, ai “Për rivlerësimin e gjyqtarëve dhe prokurorëve”, pr/ligji “Per organizimin e gjyqësorit”; ai “Për organizimin e prokurorisë”; “Për organet e qeverisjes së sistemit te drejtësisë”, pr/ligji Për Organizimin e Pushtetit Gjyqësor”; pr/ligji “Per statusin e gjyqtareve dhe prokuroreve” dhe ai “Për organizimin dhe funksionimin e institucioneve për te luftuar korrupsionin dhe krimin e organizuar”.
E hëna, e shpallur ditë pushimi për administratën me vendim qeverie, do të shënojë edhe seancën e fundit të sesionit të 6 të Kuvendit të Shqipërisë, legjislatura e tetë.
