Ka përfunduar pas rreth 2 orësh takimi mes kryeministrit Rama, kreut të LSI, Meta dhe kreut të opozitës Basha.
Takimi i thirrur nga kreu i Kuvendit, Ilir Meta për reformën në Drejtësi u zhvillua në Kryesinë e Kuvendit.
I pari që është larguar nga mbledhja ka qenë kryeministri Rama, ndërkohë që Basha dhe Meta vijojnë të mbeten në Kryesinë e Kuvendit.
Kreu i PD, përmes një prononcimi të shkurtër për mediat pas takimit deklaroi se kanë caktuar nga 1 përfaqësues për të arritur edhe në versionin final të Reformës në Drejtësi. Diskutimi sipas tij do të fokusohet te propozimi hibrid i Nuland, por duke u bazuar edhe tek raporti i Komisionit të Venecias.
Përmes një statusi në rrjetet sociale, Rama ka bërë të ditur se do zhvillojë edhe një prononcim për mediat lidhur me fatin e Reformës në Drejtësi.
Ambasadorët e BE dhe SHBA, Romana Vlahutin dhe Donald Lu, pak me heret me anë të një njoftimi për shtyp patën deklaruar se nuk marrin pjesë në takim nëse nuk nisen diskutimet nga propozimi hibrid bërë nga ndihmës sekretarja e Shtetit, Viktoria Nuland.
