Përshëndetje z. Veliaj.
Ju falënderojmë për punën e pandalshme në prishjen e gardheve dhe mureve të pallateve, shtëpive dhe çfarëdo ndërtimi për lirimin e hapësirave publike.
Është një detyrë e institucioneve shtetërore që mos të lejojnë ndërtimet e tyre, por duke pranuar realitetin qytetarët e Tiranës duhet të kënaqen vetëm me prishjet.
Admiruese është kur shikon që ligji vepron duke filluar nga të varfrit dhe shtresat e pambrojtura sepse tregon që institucionet janë me integritet të plotë dhe nuk bëjnë dallime dhe tregojnë rigorozitet në zbatimin e ligjit. Statuset e f.b tuaj janë të mbushura me raste të tilla.
Pyetja që duam t’ju shtrojmë është çfarë ndodh me grupet e forta të interesit, aq më shumë me ato që kanë dhe bekimin e kryeministrit? A kanë ato të njëjtin trajtim si të gjithë qytetarët e Tiranës kur vjen puna te lirimi i hapësirave publike?
Të gjithë e dinë për ndërtimin e stadiumit të ri që tashme ka filluar punën me rrethimin e kantierit. Kur shikon këtë kantier të lind pyetjet:
Pse rrethimi i kantierit të ndërtimit nga ky subjekt ka bllokuar gjysmën e korsisë komplet përreth stadiumit?
Pse rrethimi i kantierit ka bllokuar trotuaret ekzistuese nga cepi në cep? A është ky subjekt ndryshe nga të tjerët që rrethimin e kantierit e vendos në mes të rrugës dhe jo tek kufiri i pronës? A ka leje ky subjekt për bllokimin e trotuareve dhe bllokimin e komplet njërës prej korsive të rrugës?
Bllokimi i korsisë dhe vendosja e sinjalistikës në rrugë a përbën rrezik për banorët mbrapa stadiumit dhe a është marrë parasysh kjo nga Bashkia e Tiranës, apo është lënë në dorë të subjektit ndërtues?
Dhe pyetja e fundit z.Veliaj a janë të gjitha këto hapësira publike!
Tregoni që institucioni i bashkisë është me integritet dhe zbaton ligjin për të gjithë qytetarët dhe subjektet dhe nuk është selektiv.
(Boldnews)
