Dy thasë me para u grabitën pak ditë më parë në aeroportin “Nënë Tereza” në Rinas dhe mund të kuptohet lehtësisht që dëmi më i madh i është bërë bankës që i posedonte këto para. Bëhet fjalë për “Raiffaisen Bank”, e cila shumë shpejt ka gjetur një mënyrë sa inteligjente aq edhe dinake për të zëvendësuar paratë e humbura dhe për t’u rikuperuar nga dëmi i pësuar.
Banka ka menduar që shuma e vjedhur të paguhet nga vetë klientët e saj. Normalisht nuk ka bërë ndonjë kërkesë zyrtare apo njoftim për klientët besnikë, por ka vendosur të shtojë disa rregulla që do të kenë ndikimin e tyre në xhepat e qytetarëve.
Të prekur janë të gjithë ata që kanë llogari apo kryejnë transferta nëpërmjet Raiffeisen Bank. Edhe veprimi më i vogël, siç është tërheqja e parave nga arka do të taksohet.
Një qytetar ka bërë denoncimin e tij në redaksinë e Jetaoshqef.al në lidhje me këtë ngjarje. Ai ka dërguar një faturë dhe bashkangjitur shkruan: ” Pershendetje JOQ! Ja ku do nxirren leket e vjedhura. Si gjithmone populli e ha, kesaj rradhe te gjithe klientet e bankes perkatese. Flm”
Në foton e dërguar nga qytetari, banka njofton klientin se nga muaji gusht do t’i mbahen komisione të përmuajshme nga llogaritë që klienti kishte pranë kësaj banke.
Duke filluar nga muaji tetor, çdo person që do të tërheqë para nga llogaria e vetë, do t’i duhet të paguajë komision. E thënë ndryshe, do të paguajmë para për të marrë paratë tona! Gjithashtu banka shton se në rast se klientët marrin kredi, nuk do të paguajnë komision. Mund të cilësohet si një taktikë e bukur nga ana e Raiffaisen për të tërhequr më shumë klientë-viktima të reja.
Gjithashtu, një komision tjetër është rritur. Bëhet fjalë për atë të transfertave brenda së njëjtës bankë, i cili nga 150 lekë për transfertë, është rritur me 30 lekë, duke u bërë kështu plot 180 lekë. / Jetaoshqef.al
