Deputetja e Partisë Socialiste, Mimoza Hafizi, në një deklaratë për mediat është ndalur sërish tek kërkesa për zgjedhjen e Presidentit nga populli.
Duke u shprehur se amendamenti është firmosur nga 10 deputetë, deputetja Hafizi u kërkon partive të mëdha politike në vend PS, PD dhe LSI që të shprehin qëndrimin e tyre lidhur me këtë propozim.
“Një nisme për ndryshime kushtetuese që kërkojnë që presidentin e republikës t’ia japim popullit. Kushtetuta parashikon zgjedhjen me 5 raunde. Nëse nuk zgjidhet me 3/5 në tre raundet e para, zgjidhet me një votë më shumë. Kjo praktikë bën që të zgjidhet nga partitë e jo nga populli. Kjo praktike e kthen presidentin në një figurë dobët dhe të varur nga partitë politike. Shqipëria ka vuajtur shumë nga vendimet e partive politike. Sot partitë janë mbi popullin dhe vendimet e tyre as nuk konsultohen as ankimohen. Për këtë shkak, ne grupi prej 10 deputetësh kemi propozuar që presidenti të zgjidhet nga populli, dhe jo nga partitë politike. Kjo praktike ndiqet nga shumë vende. Shqipëria do vazhdojë të jetë republikë parlamentare pavarësisht formës së zgjedhjes së parlamentit.
Prej 1 jave grupet parlamentare nuk shprehen nëse janë pro apo jo. I pyesim partitë PD, PS, LSI, a janë dakord për zgjedhjen presidentit nga Populli. Nëse janë të firmosin amendamentin, nëse nuk janë të sqarojnë qytetarët se pse nuk e duan.
U kërkojmë deputetëve të firmosin ndryshimet kushtetuese. Prej 4-5 ditësh kemi nisur një peticion online. Në një numër rekord vihen re firmat në këtë peticion. Firma juaj do të jetë presion mbi partitë e vjetra”, tha deputetja Hafizi.
