Shteti shqiptar ia ka besuar ruajtjen e sigurisë kombëtare një…kompanie private. Ky fakt i rëndë u pranua nga Drejtori i Policisë së Tiranës, Ervin Hodaj, në një deklaratë mesditën e së Premtes, në tentativën e parë zyrtare për të justifikuar mungesën e reagimit të policisë gjatë vjedhjes spektakolare në pistën e aeroportit të Rinasit.
Kryepolici i Tiranës deklaroi para medias se, gjithçka ndodhi, ishte përgjegjësi e firmës private të sigurisë, të kontraktuar nga koncensionari i aeroportit. Ai u kujdes të jepte detaje se deri ku shtrihej juridiksioni i Policisë Shqiptare. Sipas Hodaj, “Policia e Shtetit mban përgjegjësi për sigurinë e udhëtarëve në Aeroportin Nënë Tereza, dhe veçanërisht në Pikën e Kalimit Kufitar Ajror, që është territori nga kabina e kontrollit, salla e tranzitit deri në vendqëndrimin e avionit”.
Pra, sipas tij, ngjarja ka ndodhur jashtë zonës së përgjegjësisë të policisë shqiptare. Në këtë mënyrë, ai deklaron se Siguria Kombëtare nuk është cënuar. Por, në deklaratat e tij ka disa të dhëna tejet shqetësuese, të cilat, në rastin më të mirë nuk duheshin bërë publike.
Por, duke u publikuar këto të dhëna, nga ana tjetër, u tregon edhe qytetarëve shqiptarë se, kur kërcënimi terrorist global është në kulmin e tij, Shqipëria nuk ka aftësi të përballojë veprime kriminale.
-Drejtori Hodaj u shpreh se zona ku ka ndodhur grabitja, pra, saktësisht në portën e pasme të avionit, mbulohet nga kompania private e sigurimit. Në deklaratë nuk u dha detaji se avioni, i cili ishte në pritje të ngarkesës me valutë, e rrëmbyer nën kërcënimin e armës nga tre persona, ishte me pasagjerë. Pra, nëse personat e armatosur nuk do të ishin vjedhjës, por terroristë që mund të rrëmbenin ose të shpërthenin avionin, ata do ta kishin realizuar. Gjë që do të thotë se, Siguria Kombëtare në këtë rast është më shumë se sa e cënuar. E megjithatë, Policia e Shtetit, nëpërmjet Drejtorit të Policisë së Tiranës, deklaroi se nuk ka përgjegjësi për vendin e ngjarjes, rrjedhimisht nuk mban përgjegjësi edhe për faktin nëse avioni do të ishte objekt i sulmit terrorist.
-Hodaj u shpreh në deklaratën e tij se, “Policia e Shtetit, bazuar edhe në masat e shtuara të sigurisë, të marrra në kuadër të luftës kundër terrorizmit, kryen shërbim me patrulla të shtuara në kabinat e kontrollit të pasagjerëve në hyrje-dalje, në ambjentet e brendshme dhe para terminalit të pasagjerëve, në ambjentet e intervistimit të shtetasve të kthyer dhe për sigurimin e personave të shoqëruar në ambientet e Komisariatit”. Pra, asnjë fjalë nuk përmenden pasagjerët që gjenden në avion. Plani i masave për sigurinë në aeroport është pikërisht sigurimi i jetës dhe shëndetit të pasagjerëve. Nëse ata gjenden jashtë sigurisë sapo hipin në bordin e avionit, gjithçka paraprake kthehet në nul.
– Për të dëshmuar se Policia ka qenë e shqetësuar për nivelin e sigurisë në Aeroport, drejtori Hodaj paraqiti elementë, të cilët do të ishte më mirë të mos i bënte publik, pasi dëshmon për situatën e pasigurisë në Aeroportin e vetëm shqiptar. Sipas kryepolicit të Tiranës, “Për shkak të konstatimit të shpeshtë të mungesës së disa elementëve të sigurisë, Policia e Shtetit me shkresë nr 457 datë 21.04.2014 i ka komunikuar autoritetit Aeroportual TIA, në lidhje me mangësitë të konstatuara në drejtim të parametrave të sigurisë, vecanërisht për sistemin e kamerave, pasi kamerat nuk mbulonin me monitorim të gjitha pikat nervlagjike të aeroportit”. Pra, nëpërmjet zërit zyrtar të Policisë së Tiranës, kujtdo elementi kriminal apo terrorist, iu bë e ditur se në aeroportin e Rinasit, me pak angazhim, mund të realizojnë qëllimet e tyre të këqija.
Lajmet e tjera për grabitjen ne Rinas
