Në Gjykatën e Posaçme u zhvillua seanca për 8 të pandehurit në lidhje me grabitjen në Rinas.
Gjatë zhvillimit të seancës, avokati i Eldi dhe Klement Çalës theksoi se dy klientët e tij janë në regjimin e posaçëm “41 biss” dhe se nuk ka pasur mundësi që të konsultohet me ta për mbrojtJen.
Avokati Elton Hyseni konfirmoi se të pandehurit kanë qenë në grevë urie dhe se nuk janë njohur me materialin që ai kishte përgatitur për të bërë mbrojtjen.
Hyseni theksoi gjithashtu se nuk iu lejohet që në ambientet e regjimit të posaçëm të futet asnjë material dhe se nuk ka pasur mundësi konsulte me dy vëllezërit. Mbrojtësi pretendoi se duke qenë se Eldi dhe Klement Çala nuk kishin marrë dijeni për mbrojtjen, nuk mund ta relatonte para gjykatës pa folur me ta nëse janë dakord me ta apo jo.
Në këtë seancë u konfirmua se të pandehurit që janë në regjimin e posaçëm “41 biss” kanë qenë në grevë urie. Po ashtu gjatë seancës pati debate nga avokatët e tjerë të cilët kërkuan që mbrojtja të bëhet sipas radhës, por më pas gjykata vendosi se ata duhet që të lexojnë konkluzionet. Polica e burgjeve bëri me dije para gjykatës se nuk lejohet që të pandehurve që janë në 41 biss t’u dërgohen dokumente.
Mbrojta e përgatitur nga avokati Elton Hyseni u është dhënë për t’u lexuar të dy vëllezërve brenda kafazit të xhamit. Më 12 korrrik është përcaktuar séance e radhës për shkak se të pandehurit do duhet të njihen me argumentet e avokatëve të tyre.
Grabitja e Rinasit ndodhi në 9 prill 2019 ku arritën të merreshin disa miliona euro në barkun e një avioni./Syri Tv/
