Gjyqtari Shyqyri Çobo ka tentuar të joshë për raporte intime një shtetase, duke i garantuar se lidhja me të do të ishte një luks për nënën e sapodivorcuar 32-vjeçare, e cila ishte palë në një proces civil të drejtuar prej tij në Gjykatën e Beratit.
Gjyqtari Çobo është pezulluar nga detyra pas kërkesës së Prokurorisë për Krime të Rënda, e cila e akuzon për “korrupsion pasiv të gjyqtarit…” në formën e kërkimit të favoreve seksuale.
“Boldnews.al” ka siguruar disa prej mesazheve erotiko-filozofike që gjyqtari Çobo i dërgonte shtetases I.T., me qëllimin për ta bindur që të krijonin një lidhje dashurore.
Gjyqtari dhe I.T., e cila ka depozituar më pas kallëzimin ndaj tij, janë njohur në seancën e parë gjyqësore, në të cilën nëna e re ishte në proces civil me ish-bashkëshortin e saj. Shtetasja I.T. nuk kishte mundësi financiare për të siguruar avokat dhe gjyqtari, në përfundim të seancës paraprake, i kërkon numrin e telefonit, në të cilin do ta merrte për t’i gjetur një avokat me kosto të ulët financiare.
Pasditen e së njëjtës ditë, në telefonin e kallëzueses, mbërrin mesazhi i parë në serinë e gjatë të rreth 200 sms me teks të dërguara nga gjyqtari Çobo: “Përshëndetje ! Gëzon të gjithë kredinë mirënjohëse nga ana ime. Performanca juaj më imponoi respekte pse jo dhe ndjesi. A u sqaruat me avokatin rekomandues. Problemi yt sinqerisht më diktoi keq-ardhje. Mos hezito me sms apo tel, do të mirëpres. Respekte, OK ?”.
Vajza 32-vjeçare e ka kuptuar qartë nëntekstin e këtij mesazhi, por nuk ka preferuar që të krijojë pakënaqësi tek gjyqtari, i cili drejtonte procesin gjyqësor civil ndaj saj. Ajo e ka falenderuar dhe më pas ka biseduar për çështjen gjyqësore, me avokatin e siguruar nga gjyqtari.
Nga ky moment, gjyqtari Çobo duket se ka tentuar në të gjitha format për ta bindur nënën e re të sapodivorcuar që të krijojë lidhje intime.
Në një mesazh të radhës, të siguruar nga “Boldnews.al”, i cili gjendet në kërkesën për pezullimin nga detyra, gjykatësi i bën një “skanim” femrës së re. “Përsa i përket çështjes të cilën natyrshëm Ti e ke “gangrenë” sinqerisht do kesh suport gjithë “kredinë” time juridike ..! Ok ?? Së dyti në kondicionin social në perceptimin tim aktualisht je “skanuar” femër (mami) tepër bashkëkohore potente plot vizion.. Ky është dhe “motivi” imponues i imi që ti të jesh mikesha ime konseguente. Nuk dua të gjykoj se ti je një zonjë provinciale me mëndësi fshatareske.. Fundja në CV-in tënde je dikushi..Shpresoj mirëkuptimin tuaj..! Ok ??”.
Më tej, gjyqtari nis të përdorë “artilierinë” e rëndë joshëse, duke thirrur në ndihmë të tij shprehje filozofike: “Psikoanalisti austriak Sesil Frojd shkruan se ‘kur je i martuar dhe ke nje te dashur ky eshte komoditet, nese i dashuri eshte dikushi atehere ky eshte luks ”. Pavarësisht tentativave të shumta, shtetasja I.T. nuk ka rënë pre e provokimeve të gjykatësit, duke e kallëzuar këtë të fundit në Policinë e Beratit.
