Policia e Shtetit po e pranon ditë pas dite se kanabisi është shpërndarë në të gjithë territorin e vendit, siç po pranon gjithashtu se nuk ka asnjë informacion se kush janë organizatorët që vijojnë të punojnë të pashqetësuar.
Gjatë javës së fundit, Policia e Shtetit ka informuar periodikisht mbi zbulimin e parcelave me lëndë narkotike canabis sattiva. Në Krujë u asgjësuan 6100 rrënjë, në Krujë 690 të tilla, në Lushnje 720 bimë të sapoçelura, në Vlorë 1200, në Pogradec 2000 dhe lista vijon me Shkodrës, Tepelenën, Elbasanin, sërish Vlorën e Krujën.
Këto të dhëna janë marrë nga “Boldnews.al” në raportimet zyrtare të Policisë së Shtetit në faqen e internetit “asp.gov.al” vetëm për periudhën 16-22 Qershor 2016.
Të gjithë njoftimet, krahas shifrave të larta, kanë një të përbashkët shqetësuese. Në çdo rast, Policia njofton se “po punon për identifikimin dhe kapje e autorëve”. Pra, parcela të tëra, me sipërfaqe dhe shtrirje të konsiderueshme, janë punuar, mbjellë dhe kujdesur pa u vënë re nga agjentët policorë.
Në tentativën mediatike për të dëshmuar efektivitetin në rritje në luftën kundër cannabis-it, Policia e Shtetit po dëshmon se ka mungesë të theksuara aftësish dhe burimesh njerëzore për të goditur këtë fenomen që vijon të jetë shqetësues për Shqipërinë.
Përgatitja e terrenit dhe mbjellja e cannabisit, e cila rezulton si bima më fitimprurëse në hapësirën shqiptare, është një proces që kërkon angazhimin e një numri të madh personash. Punimi i tokës, mbjellja e farës dhe ujitja e saj janë procese, të cilat kërkojnë kohë dhe fuqi punëtore. Por këto procese, siç rezulton, nuk janë konstatuar nga agjentët policorë të terrenit në të gjithë Shqipërinë.
