Një shqiptar, identiteti i të cilit nuk bëhet i ditur, që u denoncua për armëmbajtje pa leje, është arrestuar edhe nën posedim të lëndëve narkotike kokainë për qëllime trafikimi.
Aksioni u krye në Botticino, kur oficerët e policisë së Breshias lokalizuan 37-vjeçarin shqiptar, me banim të ligjshëm, por me precedentë të shumtë kriminalë, veçanërisht për drogë.
E gjitha filloi me një informacion, se ai mbante armë pa leje në shtëpinë e tij. Kur policia bastisi godinën, bënë dhe një zbulim të dyfishtë. Arma ishte në fakt një “lodër” – një kopje perfekte e një pistolete gjysmëautomatike – por ata gjetën edhe pesë qese kokaine, gati për shitje.
Në total, afërsisht 45 gramë pluhur të bardhë, një peshore precize dhe 620 euro në para të gatshme, të ndara në prerje të vogla.
Shqiptari u dërgua në stacionin e policisë dhe u arrestua për posedim të lëndëve narkotike me qëllim shitjen e tyre. Pas kontrolleve të zakonshme, ai u mbajt në paraburgim në pritje të vendimit të prokurorit, informon media italiane.
Duke pasur parasysh rrezikshmërinë e tij shoqërore dhe listën e gjatë të të dhënave kriminale, Shefi i Policisë së Breshias, Paolo Sartori, ia revokoi lejen e qëndrimit, duke i hapur rrugën dëbimit të tij sapo të mbaronte paraburgimi.
