Komisioneri i Bashkimit Europian për Fqinjësi dhe Zgjerim Johanes Hahn i ka bërë thirrje klasës politike shqiptare të bëjë edhe kilometrin e fundit dhe të sigurojë shumicën prej 2 të tretash për ndryshimet kushtetuese lidhur me reformën në drejtësi.
Në një deklaratë, komisioneri Hahn, nxit palët të vendosin interesin e vendit dhe të qytetarëve mbi interesat individuale dhe të gjejnë kompromis për çështje politike pa prekur thelbin e reformës.
“Përshëndes punën konstruktive të bërë deri tani për reformën themelore të drejtësisë në Shqipëri që është mbështetur nga ekspertë vendorë dhe ndërkombëtarë si Euralius, OPDAT apo Komisioni i Venecias. Një miratim i shpejtë i reformës dhe zbatimi i saj pasues është tashmë kyç. Kjo jo vetëm që do t’i përgjigjej mbështetjes së madhe publike në Shqipëri për reformimin e sistemit të drejtësisë, por do të sinjalizonte gjithashtu një angazhim të qartë ndaj standardeve evropiane dhe procesit të integrimit evropian”, thekson Hahn.
Ai bën thirrje që thelbi i reformës të mos preket por të gjendet kompromis për çështjet politike.
“Tani është me rëndësi të bëhet dhe kilometri i fundit dhe të sigurohet shumica prej dy të tretash që nevojitet për ndryshimet përkatëse kushtetuese. “Prandaj, i nxis të gjitha palët, përfshirë opozitën, që ta vendosin interesin e vendit të tyre dhe atë të qytetarëve mbi interesat e tyre individuale dhe të gjejnë kompromise për çështjet e mbetura politike, pa kompromentuar thelbin e draft reformës të pranuar ndërkombëtarisht”, shprehet më tej eurokomisioneri.
Hahn shprehet se ditët e ardhshme do të ketë një vendim për Shqipërinë nëse do të përparojë drejt Kampionatit evropian.
“Ditët e ardhshme do të vendosin nëse Shqipëria do të përparojë drejt Kampionatit Evropian apo nëse do të qëndrojë në fazën e grupeve”, përfundon deklarata e Hahn.
