Elvis Rroshi, kryetari i Bashkisë së Kavajës, është “viktima” e parë dhe më spektakolare e ligjit “Për dekriminalizimin”.
Mesditën e së martës ai njoftoi nëpërmjet një statusi të gjatë në llogarinë e tij në “Facebook” se ishte detyruar të jepte dorëheqjen, pasi ishte njohur “rastësisht” me një dënim të dhënë ndaj tij kur ka qenë vetëm 16 vjeç në një kamp refugjatësh në Itali. “Boldneës.al” ka publikuar më parë letrën e plotë publike të Rroshit, ku jep disa shpjegime të mjegullta mbi shkaqet që e detyruan të largohet nga posti që e mbante prej dy mandatesh. Askush nuk mund të thotë sot se për cilën vepër është dënuar Rroshi në Itali, pasi edhe ai vetë ka preferuar ta mbajë të fshehtë. Por, vepra duket se ka qenë e rëndë, përsa kohë ai u detyrua të heq dorë nga posti i kryebashkiakut.
“Boldnews.al” mësoi nga njerëz të afërt me Rroshin se dorëheqja nuk ka qenë një vendimmarrje aspak e lehtë për kryebashkiakun e Kavajës. Ai është përballur prej kohësh me sulmet e opozitës së djathtë lidhur me të shkuarën e tij dhe përfshirjen në vepra të ndryshme penale.
Por deri më tani, ai ka rezistuar ndaj akuzave të shpeshta të opozitës, falë edhe mbështetjes së hapur të kryetarit të Partisë Socialiste dhe njëkohësisht, kryeministrit Edi Rama. Fakti që Elvis Rroshi i detyrua të japë dorëheqjen është një dëshmi e qartë se ai ka humbur mbështetjen e kryetarit të tij. Rama, i cili deri më tani ka mbrojtur me fanatizëm deputetët dhe drejtuesit lokalë të partisë së tij, duket se është dorëzuar në rastin e Rroshit. Në Bashkinë e Kavajës, shumëkush është në dijeni se vetëm pak ditë më parë ka pasur një debat telefonik ndërmjet Rroshit dhe Edi Ramës. Njerëz pranë kryebashkiakut janë mundur të qetësojnë drejtuesin e tyre lokalë, duke shpresuar në një zbutje të Ramës. Por edhe ky i fundit, i gjendur nën presionin e opozitës, por sidomos nën presionin e ndërkombëtarëve, ka vendosur të “djegë” kartën Elvis Rroshi. Dorëheqja e kryebashkiakut të Kavajës është një kosto e lartë për kryetarin e PS-së. Por, kosto do të ishte akoma më e lartë nëse do të vijonte ta mbështeste me kokëfortësi. Për këtë arsye, nga e marta Elvis Rroshi e mbyll ciklin e tij në nivele drejtuese të administratës dhe tashmë Kavaja duhet të zgjedhë një kryetar të ri.
