Komisioni parlamentar i Sigurisë diskuton sot skandalin e përgjimeve dhe përdorimin e pajisjes nga Policia e Shtetit pa autorizimin e prokurorisë. Për të raportuar për ekzistencën e kësaj pajisjeje, ndodhet në Komision Kreu i SHISH, Visho Ajazi Likaj, i cili ka kërkuar të flasë pa praninë e mediave.
Kjo gjë ka sjellë edhe debate. Deputeti demokrat, Astrit Patozi tha që raportimi të bëhet me prezencën e mediave dhe më pas debati të vijojë pa praninë e tyre.
Ishte Shërbimi Informativ Shtetëror ai që referoi ekzistencën e pajisjes së përgjimeve në Prokurori, e cila më pas nisis hetimet.
Gjatë raportimit në komision, Visho Ajazi kërkoi largimin e mediave, pasi cenohet siguria kombëtare nëse dëshmia e tij bëhet publike. Mirëpo, kjo është kundërshtuar nga Paulin Sterkaj, i cili tha se çështja e pajisjes përgjuese është bërë tashmë publike dhe s’ka sens që kreu i SHISH të flasë pa kamera.
Visho Ajazi tha gjithashtu se SHISH dispononte informacionin për pajisjen por jo se kush është përgjuar dhe pse është përdorur. Sipas tij, pajisja nuk u deklarua. Kreu i SHISH tha se nuk ka kontaktuar me ministrin e Brendshëm për këtë cështje. Ai ka shtuar se informacioni ishte se pajisja ndodhej në Vlorë dhe se shqetësimin e tij e ka ndarë me Prokurorin e Përgjithshëm.
“Dy muaj të shkuara morëm informacion se një pajisje kishte ardhur në Shqipëri. Ne u informuam që ajo pajisje ishte vendosur në Vlorë për trajnim. Se çfarë është kjo pajisje të gjithë mund ta shohin në internet. Ajo pajisje na thanë se nuk ishte deklaruar. Për këto arsye, i shqetësuar se një pajisje e tillë mund të përdorej në mënyrë të paligjshme, raportova te Prokurori i Përgjithshëm. Kaq informacion kishim ne. Lidhur se me çfarë është thënë në media, ne refuzojmë të shkojmë publikisht se kemi punën tonë. I kërkuam Prokurorisë të marrë informacione më shumë për këtë pajisje. Për asnjë moment ne nuk kemi kërkuar të zbulojmë si përdoret kjo pajisje se ne nuk kemi tagër. Është tagri i Prokurorisë, i vetmi informacion që kishim është që pajisja kishte hyrë në Shqipëri dhe përdorej për trajnim nga Policia italiane për policinë shqiptare. Të gjitha të tjerat janë nga Prokuroria, s’kemi asnjë informacion kush është përgjuar dhe si është përgjuar”, ka thënë kreu i SHISH.
