Pak ditë pasi u tërhoq nga vendimi për shkak të protestës, Gjykata Administrative e Apelit ka vendosur të rrëzojë kërkesën e Bashkisë së Tiranës për ndryshimin e trupës gjykuese për çështjen e ndërtimit të pallatit 17-katësh, tek diga e Liqenit Artificial.
Mësohet se gjykata ka refuzuar edhe kërkesën e palës mbrojtëse për ndryshim të gjyqtarëve. Bashkia e Tiranës kërkonte përjashtimin e tre gjyqtarëve me argumentin se kanë konflikt interesi, pasi janë të afërm të ndërtuesve.
Kërkesa e dytë në gjykatë ishte e firmës që po ndërton objektin, që kërkonte shfuqizimin e vendimit të Inspektoratit Ndërtimor Urbanistik që pezulloi ndërtimin, kërkesë për të cilën Gjykata Administrative e Apelit nuk është shprehur ende.
Sipas Bashkisë së Tiranës, leja e ndërtimit është dhënë në kundërshtim me moratoriumin për ndalimin e ndërtimeve, pasi qeveria e ka shpallur moratoriumin në datë 22.08.2014, ndërsa leja mban datën 14.10.2014. Me tej në arsyetimin e saj, në lidhje me shkeljet që ka kjo leje, Bashkia përcakton se ajo bie ndesh me vendimin e Komitetit Kombëtar të Digave, i cili përcakton rrezikshmërinë e ndërtimeve poshtë digës së Liqenit Artificial. Pika e tretë ku bashkia mbështetet për shkeljen e kësaj lejeje është fakti se leja është dhënë pa pasur një Plan të Detajuar Vendor(PDV).
Leja për ndërtimin e kompleksit të banimit, prej 5 strukturash, me lartësi deri në 17 kate dhe tre kate nëntokë, te diga e liqenit u dha në kohën kur kryetar bashkie ishte Lulzim Basha. Afati kohor i kësaj leje është data 14.10.2019.
Çështja e pallatit 17-katësh ka sjellë një përplasje edhe mes Bashkisë së Tiranës dhe Presidentit të Republikës, njëherësh kreu i KLD-së, Bujar Nishani. Bashkia zhvilloi një protestë javën që shkoi kundër Gjykatës Administrative dhe kërkonte dorëheqjen nga çështja të trupës gjykuese, për konflikt interesi.
