Deputeti i Partisë Socialiste Erjon Braçe është shprehur kundër ministrit të Drejtësisë Ylli Manjani, lidhur me deklaratat e këtij të fundit që ka kritikuar mazhorancën për çështje të ndryshme.
Braçe i kërkoi kreut të grupit parlamentar të PS Gramoz Ruçi që të gjendet një zgjidhje për këto deklarata të ministrit të LSI dhe ka kërkuar që Manjani të kërkojë falje për kritikat që i bën mazhorancës, duke rrezikuar koalicionin.
Ministri i Drejtësisë ka akuzuar mazhorancës së fundmi, duke shigjetuar Partinë Socialiste siç ishte rasti i fundit i skandalit seksual të Shukri Xhelilit, për të cilin tha se duhet të dënohet, apo rasti i protestës së Erion Veliajt para Gjykatës Administrative, të cilën gjithashtu e dënoi si ngjarje.
Ja çfarë deklaroi Erjon Braçe në mbledhjen e djeshme të grupit të PS:
“Në këtë drejtim edhe unë dua të ngre një shqetësim. Prej javësh, ministri i Drejtësisë hedh baltë mbi mazhorancën. Këto qëndrime nuk duhen anashkaluar. Ai duhet të japë shpjegime mbi këto qëndrime që na prekin. Unë nuk besoj se janë rastësore dhe aq sporadike që sa herë del ministri Manjani thumbon në krahun tonë. Në këtë aspekt, duhet të mbahet një raport apo qëndrim sepse s’mund të durojmë dhe as tolerojmë të tilla qasje. Ai duhet të dalë e të kërkojë ndjesë, se ka cënuar koalicionin”.
